Sin invit da la Regenza ha l'ambassadur talian, Gian Lorenzo Cornado, visità oz il chantun Grischun.
L'ambassadur Gian Lorenzo Cornado è vegnì beneventà oz en la Chasa grischa a Cuira dal president da la Regenza Jon Domenic Parolini e dal chancelier Daniel Spadin. L'ambassadur è vegnì accumpagnà dal consul general Mario Baldi. Suenter il barat dals salids uffizials è in gentar cuminaivel stà sin il program.
La Regenza grischuna tgira annualmain contacts cun represchentantas e represchentants da stadis esters en Svizra. Ils discurs èn elements impurtants da las relaziuns externas dal chantun. Cun ils stadis vischins e cun ils pajais che han relaziuns spezialas cun la Svizra e cun il Grischun vegnan discutadas savens dumondas specificas actualas. Autras visitas servan en emprima lingia a barattar experientschas sin il champ cultural, economic e politic.
Fotografia agiuntada:
Da sanestra: Consul general Mario Baldi, president da la Regenza dr. Jon Domenic Parolini, ambassadur Gian Lorenzo Cornado e chancelier Daniel Spadin
responsabladad: Regenza