La curuna dal mir circumdant dal stabiliment giudizial Cazas Tignez sto vegnir sanà. En quest connex sa tracti da l'eliminaziun d'in donn da construcziun ch'è vegnì remartgà entaifer il temp da garanzia. Las lavurs da sanaziun cumenzan las proximas emnas e duran probablamain fin il zercladur. Sin las pretensiuns da segirezza dal stabiliment giudizial n'ha il donn da construcziun nagina influenza.

Il stabiliment giudizial a Cazas è caracterisà d'ina zona da segirezza exteriura marcanta cun in mir da betun da 7 meters autezza e da var 1 kilometer lunghezza sco er cun pliras saivs da metal. Il mir enturn il stabiliment giudizial serrà Cazas Tignez, ch'è vegnì mess en funcziun il favrer 2020, serva sco protecziun da fugia e sco paravista per las var 150 persunas arrestadas.

Avant la scadenza da la garanzia è vegnida controllada l'entir stabiliment nov. En quest connex ha il chantun, sco patrun da construcziun, constatà sfessas en il sectur da la curuna dal mir. Ils donns n'han dentant ni influenza sin la stabilitad dal mir ni sin la garanzia da las pretensiuns da segirezza dal stabiliment giudizial. La protecziun da la publicitad n'è betg periclitada pervia da quai.

Cuvrida da sturs sco protecziun duraivla
Per eliminar las sfessas e per impedir ch'i dettia talas en il futur, vegn ussa montà sin la curuna dal mir ina cuvrida da sturs sco protecziun duraivla per il mir circumdant. Cun questa reparaziun planisada han ins pudì chattar ina soluziun resistenta che correspunda a las pretensiuns constructivas, ma er a las pretensiuns dal manaschi. Per il chantun sco patrun na resultan nagins custs, perquai ch'i sa tracta d'in cas da garanzia e perquai ch'ils custs vegnan surpigliads dals construiders.

Las lavurs da sanaziun per lung dal mir circumdant vegnan realisadas las proximas emnas. Il temp da construcziun vegn tegnì curt, per ch'il manaschi dal stabiliment giudizial vegnia disturbà uschè pauc sco pussaivel. La fin da zercladur 2024 vegnan probablamain tut las lavurs ad esser exequidas. Durant il temp da construcziun vegnan prendidas mesiras da segirezza spezialas, per che la segirezza restia garantida cumplainamain.

Fotografias agiuntadas:

©Ralph Feiner

Infurmaziuns:

• Andreas Kohne, architect chantunal, Uffizi da construcziun auta dal Grischun, tel. +41 81 257 36 31 (cuntanschibel da las 11.00 fin las 12.00), e‑mail Andreas.Kohne@hba.gr.ch
• Ines E. Follador-Breitenmoser, directura dal Stabiliment giudizial Cazas Tignez, tel. +41 81 423 12 01 (cuntanschibla da las 11.00 fin las 12.00), e‑mail Ines.Follador@ajv.gr.ch