Dals 15 da matg fin ils 15 da zercladur 2024 han lieu en tut la Svizra dis d'acziun che stattan sut l'ensaina dals dretgs da las persunas cun impediments. En il Grischun pon uffants, giuvenils, famiglias, scolas e persunas creschidas visitar in grond dumber d'acziuns. La finamira cuminaivla da tut las parts participadas è quella da sensibilisar la publicitad per l'impurtanza d'ina societad inclusiva.
Las persunas cun impediments han ils medems dretgs sco tut las autras persunas. Ellas duain pudair participar ad occurrenzas da temp liber, culturalas e da sport. E sco tuts duain er las persunas cun impediments avair il medem access a la furmaziun, als fatgs da sanadad, al martgà da lavur, al spazi d'abitar ed als negozis sco er a l'infurmaziun ed a la communicaziun.
Pli che 50 acziuns en il Grischun
Ils dis d'acziun 2024 en il Grischun èn giagls e multifars. Las occurrenzas tematiseschan differents secturs da la vita: lavur e furmaziun, cultura, mobilitad, abitar, sport e temp liber.
Tut en tut datti var 50 differentas acziuns – dal café «pop up» inclusiv sur in concert translatà en lingua da segns, vias tematicas per persunas cun impediments da la vesida e per persunas tschorvas, lavuratoris en lingua facila, eveniments da teater e da museum inclusivs fin ad occurrenzas da sport ed ad events che mettan il focus sin la lavur e sin la scolaziun.
L'Uffizi dal servetsch social è cumpetent per la coordinaziun dals dis d'acziun. Las occurrenzas da las uniuns, da las organisaziuns e da las interpresas èn per regla publicas e sa drizzan a l'entira populaziun. La pagina d'internet www.futur-inclusiun.ch/gr porscha infurmaziuns davart il program e davart las singulas acziuns.
Giubileum dubel per ils dretgs da las persunas cun impediments
L'onn 2024 festivescha la Svizra dus giubileums impurtants che represchentan muments decisivs en l'istorgia dals dretgs da las persunas cun impediments, numnadamain 10 onns ratificaziun da la Convenziun da l'ONU davart ils dretgs da las persunas cun impediments e 20 onns Lescha davart l'egualitad da persunas cun impediments.
Ils dis d'acziun naziunals vulan sensibilisar la publicitad per las sfidas e per las pussaivladads da l'integraziun da las persunas cun impediments e promover propostas da soluziun praticas concretas. Durant il mais d'acziun per ils dretgs da las persunas cun impediments han lieu en l'entira Svizra passa 1000 acziuns.
Infurmaziun per las redacziuns:
Las represchentantas ed ils represchentants da las medias vegnan envidads d'accumpagnar ils dis d'acziun 2024 e da rapportar davart las activitads multifaras.
Agiunta:
Logo Futur inclusiun (en quatter linguas)
Infurmaziuns:
Daniel Kistler, manader Integraziun da persunas cun impediments, Uffizi dal servetsch social dal Grischun, tel. +41 81 257 26 63 (cuntanschibel da las 13.30 fin las 15.30), e‑mail Daniel.Kistler@soa.gr.ch
Responsabladad: Uffizi dal servetsch social