La Regenza ha approvà da surdar fin ils 31 da december 2025 ina incarica da prestaziun a l'uniun Oase per il project da pilot «Housing First». L'incarica da prestaziun stat en connex cun la realisaziun da la Lescha d'agid per persunas toxicomanas en il chantun Grischun. L'agid per persunas dependentas ha la finamira da porscher a temp agid a las persunas che consumeschan drogas, da rinforzar l'agid per gidar sasez e da mantegnair u da meglierar la sanadad da las persunas pertutgadas. La contribuziun chantunala da maximalmain 198 300 francs per quest project è gia resguardada en il preventiv 2024.

Il concept da «Housing First» prevesa da princip, ch'i vegnia mess a disposiziun spazi d'abitar a persunas senza abitaziun e/u senza tetg, e quai senza fixar cundiziuns spezialas per quest spazi d'abitar. Il concept è adattà cunzunt per persunas cun in tschert basegn da sustegn, per regla per persunas ch'èn gia ditg senza abitaziun e che han ina dependenza da drogas e/u ina malsogna psichica. Persunas che fan diever da «Housing First» vivan en moda independenta e ston respectar las cundiziuns da locaziun usitadas. Ellas survegnan dentant sustegn en furma da cussegliaziun ed assistenza. Uschia survegnan ellas access ad in provediment medicinal psichiatric sco er a purschidas d'agid per persunas dependentas. Plinavant vegn promovida l'integraziun sociala. Cumbain ch'i na vegn pretendì nagina abstinenza u nagins tractaments, vegnan las utilisadras ed ils utilisaders da «Housing First» encuraschads da minimar il consum nuschaivel e d'acceptar agid. Durant la fasa da pilot dal project metta l'uniun Oase a disposiziun a partir da l'avust 2024 ina purschida da basa per tschintg persunas.

La Regenza ha concedì ina incarica da prestaziun per «Hometreatment» als Servetschs psichiatrics dal Grischun (SPGR). Hometreatment è ina nova purschida da tractament psichiatric-psicoterapeutica integrada da la psichiatria da persunas creschidas e da la psicoterapia. El remplazza u almain scursanescha ils tractaments staziunars. Cun il hometreatment na vegnan stgaffidas naginas novas capacitads. La nova purschida remplazza u scursanescha plitgunsch ils tractaments staziunars en las clinicas dals SPGR.

Il hometreatment sa drizza a pazientas e pazients creschids che pateschan d'ina malsogna psichica acuta e ch'èn perquai dependents temporarmain d'in tractament pli intensiv. Il tractament vegn fatg d'in team multiprofessiunal che visita ed assista per quest intent las pazientas ed ils pazients en lur agen ambient chasan, tut tenor basegn ina u pliras giadas per di. Il tractament gida a superar la fasa acuta ed a sa stabilisar en l'ambient social usità. Cumpareglià cun il tractament en il rom staziunar è l'avantatg principal dal hometreatment quel, ch'il tractament è pli datiers da la realitad da la vita da las pazientas e dals pazients.