Per la 27avla giada ha il chantun Grischun publitgà ina concurrenza per promover projects gronds da la lavur culturala professiunala. Da las tut en tut 31 dumondas èn tschintg projects vegnids onurads cun ina contribuziun d'ovra u cun in stipendi liber. La summa totala importa 100 000 francs.
Cun ils daners da sustegn da la concurrenza survegnan artistas ed artists la pussaivladad da lavurar vi d'ina ovra creativa, e quai senza squitsch finanzial e professiunal. La finamira è quella da pussibilitar il svilup tematic da projects culturals. Il dretg da sa participar a la concurrenza han artistas ed artists professiunals che han lur domicil dapi almain 2 onns en il chantun Grischun u ch'èn colliads stretgamain cun il chantun Grischun u cun la cultura grischuna. La Cumissiun da concurrenza ha giuditgà quest onn tut en tut 31 dumondas ord las spartas da l'art applitgà e da l'art figurativ, dal film, da l'istorgia e memoria, da la litteratura, da la musica, dal saut e dal teater.
Il schef dal Departament d'educaziun, cultura e protecziun da l'ambient, president da la Regenza Jon Domenic Parolini, ha decidì – sin proposta da la Cumissiun da concurrenza e da l'Uffizi da cultura – davart la surdada da las contribuziuns d'ovra.
Las suandantas tschintg artistas ed artists han survegnì ina contribuziun d'ovra da mintgamai 20 000 francs:
- Num: Ursula Brunold-Bigler, Cuira
Sparta: Istorgia e memoria
Project: «L'erbari da las spendreras e da las dunnas curativas»
- Num: Sibilla Caflisch, Birsfelden
Sparta: Art figurativ
Project: «dal Lunghin al Rein»
- Num: Felicitas Heyerick, Tumegl
Sparta: Musica / teater
Project: «à la DIVA»
- Num: Jürg Wirth, Lavin
Sparta: Litteratura
Project: «In entir tschientaner: Ida Spinnler – Randulina, dunna d'in artist divorziada ch'educhescha suletta»
- Num: Peter Conradin Zumthor, Haldenstein
Sparta: Musica
Project: «TUN – Musica per solopercussiun da e cun Peter Conradin Zumthor»
Dapli infurmaziuns:
Infurmaziuns:
Andrea Conrad, manadra Promoziun da la cultura, tel. +41 81 257 48 07 (cuntanschibla da las 14.00 fin las 15.00), e‑mail Andrea.Conrad@afk.gr.ch
Responsabladad: Uffizi da cultura / Promoziun da la cultura