La Regenza ha prendì posiziun tar in project da consultaziun dal Departament federal da finanzas DFF en connex cun il pachet da distgargia 2027 da la Confederaziun. Il pachet da distgargia ha en mira da far correcturas considerablas da fin 3 milliardas francs en la planisaziun actuala da las finanzas da la Confederaziun. Uschia preschenta il Cussegl federal mesiras per reducir l'augment da las expensas e per puspè metter en equiliber las finanzas.

En sia resposta al DFF constatescha la Regenza, che finanzas federalas saunas sajan en l'interess da l'entira Svizra ed en spezial er dals chantuns cun paucas resursas, sco il Grischun. En emprima lingia duai la sanaziun da las finanzas cumpigliar las incumbensas da la Confederaziun. Cunzunt na dastgan ils custs per las incumbensas federalas betg vegnir adossads als chantuns. Ils chantuns vegnan ils proxims onns oramai confruntads cun novas expensas, quai oravant tut pervia da midadas planisadas da leschas federalas. En quest reguard ston vegnir numnadas spezialmain l'aboliziun da l'imposiziun da la taglia sin la valur da l'atgna locaziun, l'introducziun da l'imposiziun da la taglia individuala, sco er las midadas tar las premias da las cassas da malsauns.

En il senn d'ina collavuraziun constructiva cun la Confederaziun sa concentrescha la Regenza en sia posiziun sin quellas mesiras che pertutgassan il chantun Grischun surproporziunalmain ed en moda finanzialmain relevanta. Latiers tutgan en spezial las mesiras che pertutgan la construcziun da vias, la protecziun dal clima, il traffic public e la politica d'integraziun e regiunala. Sche las mesiras proponidas da la Confederaziun vegnissan realisadas cumplettamain, vegnissan las finanzas dal chantun engrevgiadas supplementarmain cun var 30 milliuns francs a partir dal 2027. Areguard il giudicament general dal project da consultaziun sustegna la Regenza la posiziun da la Conferenza da las regenzas chantunalas (CdC) dals 14 da mars 2025.

Documents da consultaziun