Sin invit da la Regenza grischuna ha la Regenza dal pajais federativ Vorarlberg visità oz il chantun Grischun. En il rom d'in discurs constructiv en la Chasa grischa a Cuira èn vegnids tractads differents temas transcunfinals.

Suenter che la Regenza dal pajais federativ il pli al vest da l'Austria è vegnida beneventada uffizialmain da la Regenza grischuna, ha cumenzà il discurs da lavur en la sala da la Regenza. La delegaziun da la Regenza dal Vorarlberg è vegnida manada dal president da la Regenza dal pajais federativ Markus Wallner, la Regenza dal chantun Grischun dal president da la Regenza Marcus Caduff.

Tuberculosa e protecziun cunter aua gronda en il focus
Il discurs da lavur ha cumenzà cun in barat general per evaluar il concept da svilup Rain Alpin. Il concept general transcunfinal mussa, sin tge trajects dal Rain Alpin ch'i dat in basegn d'agir pervia da donns en cas rars d'aua gronda. Plinavant è questa scuntrada stada ina buna occasiun per discurrer cuminaivlamain davart la situaziun da tuberculosa. Tant en il Vorarlberg sco er en il Grischun è la transmissiun potenziala d'agents patogens da tuberculosa tranter ils animals selvadis ed ils arments in tema essenzial.

Buna collavuraziun tranter vischins
La visita da la Regenza dal Vorarlberg ha er servì a tgirar las relaziuns amicablas ed a barattar experientschas sin ils champs da la cultura, da l'economia e da la politica. Suenter il discurs da lavur èn stadas sin il program la visita d'in concert d'orgla en la catedrala da l'Assumziun da Maria sco er ina visita dal Museum dal stgazi da la catedrala. Interessant è en quest connex: L'uvestgieu da Cuira aveva durant blers tschientaners la cumpetenza ecclesiastica er per tscherts territoris dal Vorarlberg dad oz. Questa colliaziun ecclesiastica signifitgava, che parts dal Vorarlberg – en spezial la part sid – appartegnevan fin il 19. tschientaner a la diocesa da Cuira. Las relaziuns cun il Vorarlberg èn tradiziunalmain impurtantas e stretgas ed èn marcadas d'ina gronda enclegientscha en blers secturs e da la buna collavuraziun tranter vischins.

Fotografias agiuntadas:

Las delegaziuns dal Grischun e dal Vorarlberg cun il president da la Regenza dal stadi federativ Markus Wallner e cun il president da la Regenza Marcus Caduff.

Il president da la Regenza dal stadi federativ Markus Wallner ed il president da la Regenza Marcus Caduff

Infurmaziuns:

President da la Regenza Marcus Caduff, schef dal Departament d'economia publica e fatgs socials, e‑mail Marcus.Caduff@dvs.gr.ch