Il cussegl da fundaziun da la Fundaziun Stavros S. Niarchos ha examinà er quest onn las dumondas da contribuziun per projects dals secturs cultura, scienza e fatgs socials. Bundant 100 projects vegnan sustegnids cun ina contribuziun finanziala.

La fundaziun ch'è vegnida constituida l'onn 2000 ha l'intent da sustegnair finanzialmain projects culturals, scientifics e socials en il chantun Grischun sco er instituziuns e persunas grischunas che s'engaschan en quests secturs. Il cussegl da fundaziun sa cumpona da Philip S. Niarchos (president), Spyros N. Niarchos, Christoph Klemm (advocat), Claus Zellner (advocat), il cusseglier guvernativ Martin Bühler e Ursin Widmer, manader da l'Uffizi da cultura.

Er quest onn èn puspè vegnids inoltrads numerus projects interessants ed innovativs da tut las regiuns dal chantun Grischun. Grazia al grond engaschament da la famiglia Niarchos han 102 dals totalmain 191 projects inoltrads pudì vegnir sustegnids cun ina contribuziun finanziala.

La Fundaziun Stavros S. Niarchos ha ina valur ordvart gronda per il chantun Grischun. Cun ses agid pon numnadamain vegnir promovids projects multifars en l'entir chantun.

Infurmaziuns:

Ursin Widmer, manader da l'Uffizi da cultura, tel. +41 81 257 48 01 (cuntanschibel da las 10.00 fin las 11.00), e‑mail Ursin.Widmer@afk.gr.ch

Responsabladad: Uffizi da cultura