La Regenza dal Principadi da Liechtenstein ha visità oz – sin invitaziun da la Regenza grischuna – il chantun Grischun. Causa che quatter da tschintg commembras e commembers da la Regenza dal Liechtenstein èn vegnids tschernids mo dacurt en lur uffizi, è l'inscunter da las duas Regenzas stà oravant tut sut l'ensaina da s'emprender a d'enconuscher.
La Regenza grischuna, manada dal president da la Regenza Marcus Caduff, ha pudì beneventar oz a Maiavilla la Regenza dal Principadi da Liechtenstein. La scheffa da la Regenza Brigitte Haas è vegnida accumpagnada dals cussegliers guvernativs Daniel Oehry, Hubert Büchel ed Emanuel Schädler sco er dal secretari da la Regenza Michael Hasler. Suenter il bainvegni uffizial ed ina runda da preschentaziun è suandà in discurs da lavur en il chastè Salenegg. Ins ha discutà davart la taglia minimala da la OECD sco er davart la collavuraziun transcunfinala en il spazi economic funcziunal da la Val dal Rain Alpin.
Las Regenzas dal Grischun e dal Liechtenstein han gia adina tgirà stretgas relaziuns amicablas. La visitas annualas da las Regenzas servan a tgirar questas relaziuns ed a barattar experientschas sin ils champs da la cultura, da l'economia e da la politica.
Fotografias agiuntadas:
Las Regenzas dal Grischun e dal Liechtenstein cun la scheffa da la Regenza Brigitte Haas sco er cun il president da la Regenza Marcus Caduff.
Scheffa da la Regenza Brigitte Haas e president da la Regenza Marcus Caduff.
Infurmaziuns:
President da la Regenza Marcus Caduff, schef dal Departament d'economia publica e fatgs socials, e‑mail Marcus.Caduff@dvs.gr.ch
Responsabladad: Regenza