La neurobiologa Sandra B. Stöckenius surpiglia a partir dal cumenzament d'october la direcziun da l'Uffizi da sanadad dal Grischun. Stöckenius davent successura da Rudolf Leuthold che va anticipadamain en pensiun suenter 26 onns sco manader da l'Uffizi da sanadad.

Stöckenius ha in'experientscha da blers onns en la perscrutaziun clinica, en il management, en il marketing ed en l'economia da provediment dal sectur da sanadad. Tar la firma AD Swiss Net SA ch'è activa en l'accumpagnament digital da terapias, è ella actualmain responsabla per sviluppar e realisar la communicaziun e las strategias d'indemnisaziun per las applicaziuns da telemedischina en cas da malsognas cronicas. Tar Roche Diabetes Care ha Stöckenius manà il team dal marketing da products e da la transfurmaziun digitala en Svizra. Suenter ses master en neurolobiologia a l'universitad da Turitg e suenter in'experientscha da 20 onns en la perscrutaziun clinica ed en il marketing da la branscha da farmazia e da tecnica medicinala, ha Sandra. B. Stöckenius absolvì in studi da management general a l'Universitad da Son Gagl. En l'Uffizi da sanadad vegn ella a manar in team da 58 collavuraturas e collavuraturs ch'èn activs en trais differents lieus.

L'Uffizi da sanadad dal Grischun exequescha la legislaziun federala e chantunala da sanadad. El surpiglia la surveglianza da la polizia da sanadad per las furnituras ed ils furniturs da prestaziuns e per las instituziuns dals fatgs da sanadad ed è responsabel per la prevenziun da sanadad sco er per la planisaziun, la garanzia e la finanziaziun dal provediment da la sanadad da la populaziun. In'ultima incumbensa da l'Uffizi da sanadad è quella da garantir il manaschi da la Centrala dal clom d'agid sanitar 144.

Fotografia agiuntada:

Infurmaziuns:

Cusseglier guvernativ Peter Peyer, schef dal Departament da giustia, segirezza e sanadad, tel +41 81 257 52 01, e‑mail medienstelle@djsg.gr.ch

Responsabladad: Regenza