La clav è surdada: la cussegliera guvernativa Carmelia Maissen ed il president da la Regenza Marcus Caduff han oz, glindesdi, inaugurà uffizialmain il nov center da dietas dal Plantahof a Landquart. L'infrastructura moderna ha ina gronda impurtanza per l'agricultura en il Grischun. Sonda, ils 24 da matg 2025, pon las persunas interessadas visitar il nov center da dietas.
«Il Plantahof è la patria emoziunala da l'agricultura grischuna. Sco center da cumpetenzas per l'agricultura surpiglia el ina posiziun directiva en il Grischun – e sia impurtanza sco instituziun da furmaziun e da cussegliaziun tanscha lunsch sur ils cunfins chantunals ora», ha ditg il president da la Regenza Marcus Caduff, schef dal Departament d'economia publica e fatgs socials. Il Plantahof po guardar enavos sin ina istorgia da passa 120 onns. Correspundentamain è l'areal dal Plantahof creschì durant blers decennis, el cumpiglia oz circa 20 edifizis.
Durant ils ultims 3 onns è l'edifizi dal center da dietas, che consista da la sala, da la cuschina e da l'alloschi, vegnì renovà en etappas. Cun ils novs edifizis cumpensatorics han ins rinforzà l'effect dal cumplex sco ensemble e mess a disposiziun al Plantahof ina infrastructura progressiva ch'ins po utilisar en moda flexibla.
Patria attractiva per puras e purs
«Cun la nova infrastructura è il Plantahof preparà bain per il futur: ils edifizis moderns satisfan a las utilisadras ed als utilisaders sco er a lur basegns differents che sa midan», ha ditg la cussegliera guvernativa Carmelia Maissen, scheffa dal Departament d'infrastructura, energia e mobilitad, en ses pled a chaschun da la surdada uffiziala da la clav a Landquart. La directura da construcziun dal Grischun ha gì plaschair da dastgar surdar ils novs lieus da lavur a l'agricultura grischuna.
«La nova infrastructura porscha ina patria attractiva a las puras ed als purs. Ella avra novas perspectivas per la scolaziun e per la furmaziun supplementara da la generaziun giuvna da puras e purs sco er per la cussegliaziun da las famiglias purilas», ha explitgà il directur dal Plantahof Peter Vincenz.
Tratg a niz la schanza
Suenter in'utilisaziun da passa 40 onns era il basegn da reparaziun dal center da dietas cun la sala, la cuschina e l'alloschi zunt grond. Ultra da quai na correspundevan ils edifizis betg pli a las prescripziuns ed als standards che valan per ils differents secturs. Cun ils novs edifizis vegnan ademplidas las pretensiuns e las prescripziuns legalas areguard la tecnologia energetica, ecologica e da segirezza sco er areguard ils basegns da las persunas cun impediments.
Per il project è stada centrala la confruntaziun cun il lieu e cun ils edifizis existents. «A chaschun da la renovaziun avain nus tratg a niz la schanza da sclerir e da meglierar la situaziun architectonica dal Plantahof, ch'era sa sviluppada dapi blers onns», ha explitgà l'architect chantunal Andreas Kohne. Cun ordinar sistematicamain ils edifizis han las differentas utilisaziuns pudì vegnir separadas cleramain – uschia èn resultads locals flexibels che pon vegnir duvrads en moda multifara er en il futur. «Grazia al project ha il Plantahof ussa in'apparientscha moderna cun ina clera situaziun d'access.»
Per gronda part interpresas regiunalas
Planisà e realisà il project han il team da planisaziun Nickisch Walder architects da Flem sco er Planalytik ScRL da Flums. Per exequir las lavurs da construcziun èn vegnidas incumbensadas per gronda part interpresas regiunalas. Ils custs per l'entir project sa movan en il rom dal credit da 24,5 milliuns francs. Quest credit avevan las votantas ed ils votants grischuns approvà en la votaziun dals 9 da favrer 2020.
Agiunta:
Fegl d'infurmaziun Inauguraziun dal center da dietas Plantahof
Fotografias agiuntadas:
Foto 2 | Foto 3 | Foto 4 | Foto 5 | Foto 6 | Fotografias © Ingo Rasp, Photography, Cuira
Infurmaziuns:
Responsabladad: Uffizi da construcziun auta
Inauguraziun dal center da dietas dal Plantahof
Sonda, ils 24 da matg 2025, ha la populaziun l'occasiun da visitar ils edifizis dal nov center da dietas. Da las 10.00 – 15.00 avra il Plantahof las portas dal center da dietas e sa legra da numerusas visitadras e numerus visitaders. A partir da las 10.30 porscha l'Uffizi da construcziun auta dal Grischun mintga ura visitas guidadas tras las localitads. Las visitadras ed ils visitaders pon empruvar e cumprar products da la butia dal bain puril e sa nutrir cun in'alimentaziun che vegn purschida. Il Plantahof po vegnir cuntanschì cun il traffic public e cun l'auto. Plazzas da parcar èn avant maun. Il plan d'access datti qua.