A partir d'immediat porscha l'Uffizi per la furmaziun professiunala novs servetschs online: Facilmain pon las persunas interessadas s'annunziar online per il diplom professiunal per persunas creschidas sco er inoltrar sin via electronica dumondas per ina cumpensaziun da dischavantatgs.

A partir d'immediat èsi pussaivel d'inoltrar facilmain online la dumonda per ina cumpensaziun da dischavantatgs u l'annunzia directa per la procedura da qualificaziun cun examen final. Sur il portal da la furmaziun professiunala pon ins plinavant chargiar si en moda segira e svelta documents, sco il curs da vita, ils attestats u expertisas medicinalas, che l'Uffizi per la furmaziun professiunala (UCFP) dovra per sia examinaziun. L'examinaziun fa il UCFP cumplettamain en ses sistem dad EED, uschia che la communicaziun da decisiuns daventa pli effizienta. Il servetsch electronic stat a disposiziun a partir d'immediat.

Diplom professiunal per persunas creschidas
Persunas creschidas pon prender suenter il diplom d'ina furmaziun professiunala da basa, senza frequentar obligatoricamain ina scolaziun formala. Sin questa via obtegnan en Svizra mintga onn var 10 000 persunas creschidas in attestat federal da qualificaziun (AFQ) u in attestat federal da furmaziun professiunala (AFP) e megliereschan lur schanzas sin il martgà da lavur. Uschia pon las interpresas sustegnair persunas creschidas che vulan prender suenter il diplom professiunal ed a medem temp garantir lur basegn da forzas da lavur qualifitgadas.

Il diplom professiunal per persunas creschidas cun experientscha professiunala na pon ins betg mo obtegnair suenter la furmaziun fundamentala professiunala regulara, mabain er sin las suandantas trais vias: cun frequentar ina furmaziun fundamentala professiunala scursanida en in manaschi d'emprendissadi, cun laschar validar prestaziuns da furmaziun (cumprova da cumpetenza e da la frequentaziun d'ina furmaziun cumplementara) u cun s'annunziar directamain per la procedura da qualificaziun cun examen final.

Cumpensaziun da dischavantatgs
Las persunas en scolaziun cun ina restricziun na dastgan betg avair dischavantatgs durant la furmaziun fundamentala professiunala, saja quai en connex cun l'emprender, durant ils examens en la scola professiunala spezialisada, durant ils curs intermanaschials u en connex cun la procedura da qualificaziun. Per quest motiv datti la cumpensaziun da dischavantatgs per persunas cun restricziuns durant la furmaziun professiunala da basa sco er per la procedura da qualificaziun cun examen final.

Sut «cumpensaziun da dischavantatgs» vegnan chapidas mesiras specificas per resguardar ils dischavantatgs che resultan d'ina restricziun, però senza adattar las finamiras d'instrucziun. Per pudair far diever da las mesiras menziunadas, dovri il consentiment dal UCFP.

Ulteriuras infurmaziuns: www.afb.gr.ch

Infurmaziuns:

Ramon Fontana, manader da la partiziun Surveglianza da la furmaziun professiunala, Uffizi per la furmaziun professiunala, tel +41 81 257 27 67, (cuntanschibel da las 09.30 fin las 10.30) e-mail Ramon.Fontana@afb.gr.ch

Responsabladad: Uffizi per la furmaziun professiunala