La Regenza propona al Cussegl grond ina revisiun parziala da la Lescha chantunala da taglia. En vista ad ina distgargia fiscala sistematica a favur da famiglias e da conjugals cun duas pajas èsi previs d'augmentar las deducziuns per conjugals cun duas pajas, las deducziuns per ils custs per la tgira d'uffants tras terzas persunas e las deducziuns per uffants. Per distgargiar fiscalmain las persunas cun activitad da gudogn duai vegnir augmentà l'import liber da taglia tar la tariffa chantunala da la taglia sin las entradas.

L'impuls per la revisiun parziala da la Lescha chantunala da taglia ha dà l'incumbensa concernent distgargias fiscalas per famiglias e per persunas spezialisadas, inoltrada ils 3 da settember 2022 dal deputà Hohl. L'emprima etappa per realisar l'incumbensa Hohl è vegnida fatga cun sbassar il pe da taglia da 100 pertschient sin 95 pertschient per las taglias sin las entradas, sin la facultad ed a la funtauna. Quest sbassament ha il Cussegl grond concludì en la sessiun da december 2023. L'effect da questa reducziun dal pe da taglia per las finanzas chantunalas sa mussa a partir dal 2025 cun in minus d'entradas da 32 milliuns francs. Las finanzas da las vischnancas e da las baselgias n'èn betg pertutgadas da quai.

Distgargia fiscala per famiglias e per conjugals cun duas pajas
La revisiun da la Lescha da taglia è la segunda etappa da realisaziun da l'incumbensa Hohl. Per sa posiziunar sco chantun attractiv per famiglias e per conjugals cun duas pajas, propona la Regenza al Cussegl grond d'augmentar la deducziun per ils custs per la tgira d'uffants tras terzas persunas da 10 000 francs sin nov maximalmain 25 000 francs, d'auzar la deducziun per conjugals cun duas pajas da 500 francs sin 2000 francs e d'augmentar substanzialmain las differentas deducziuns per uffants. Concernent las deducziuns per uffants duai il chantun Grischun uschia sa metter a la testa en la cumparegliaziun naziunala.

Distgargia fiscala per persunas cun activitad da gudogn
Per distgargiar fiscalmain las persunas cun activitad da gudogn duain las taglias sin las entradas vegnir reducidas cun auzar l'import liber da taglia tar la tariffa chantunala da la taglia sin las entradas. Tar la tariffa chantunala da la taglia sin las entradas èsi previs concretamain d'augmentar l'import liber da taglia per 500 francs sin nov 16 000 francs. Uschia profiteschan tut las persunas obligadas da pajar taglia d'ina tariffa da taglia pli favuraivla, ed en spezial las persunas cun in'activitad da gudogn, sco lavurantas e lavurants imponids a la funtauna, conjugals cun duas pajas e persunas pensiunadas che vulan cuntinuar a lavurar suenter il pensiunament.

La revisiun parziala da la Lescha chantunala da taglia procura per ina distgargia fiscala da 21 milliuns francs tar las taglias chantunalas, da 20 milliuns francs tar las taglias communalas e da 2 milliuns francs tar las taglias da baselgia.

Medemamain en il rom da la realisaziun da l'incumbensa Hohl ha gì lieu l'examinaziun da la progressiun reala, pretendida dal deputà Schneider. Questa examinaziun ha mussà, ch'i na dat nagin motiv per introducir ina cumpensaziun legala da la progressiun reala en il chantun ed en las vischnancas grischunas. L'augment da las tariffas da taglia che resulta tras l'auzament da la capacitad da cumpra (progressiun reala) è en il passà vegnì cumpensà – e per part schizunt surcumpensà – cun agid da revisiuns da la Lescha da taglia e da sbassaments dals pes da taglia.

Distgargia annuala da 75 milliuns francs
La Regenza spera che la realisaziun totala da l'incumbensa Hohl augmentia l'attractivitad dal chantun Grischun sin plaun naziunal ed internaziunal, e quai cunzunt per famiglias e per persunas cun in'activitad da gudogn. Cumpareglià cun ils auters chantuns sa segirescha il chantun Grischun uschia sia buna posiziun concernent la taglia sin las entradas da las persunas natiralas. Il chantun vegn a purtar la cumpart principala da passa dus terzs da la distgargia fiscala totala da var 75 milliuns francs per onn.

La Regenza ha deliberà la missiva correspundenta per mauns dal Cussegl grond che duai tractar la missiva en la sessiun d'avust 2025. Igl è planisà da metter en vigur la revisiun parziala da la Lescha chantunala da taglia per il 1. da schaner 2026.

Agiunta:

Missiva

Infurmaziuns:

• Cusseglier guvernativ Martin Bühler, schef dal Departament da finanzas e vischnancas, tel. +41 81 257 32 01 (cuntanschibel da las 09.00 fin las 11.00), e‑mail Martin.Buehler@dfg.gr.ch
• Angelo Roberto, manader da l'Administraziun chantunala da taglia, tel. +41 81 257 34 44 (cuntanschibel da las 08.30 fin las 12.00), e‑mail Angelo.Roberto@stv.gr.ch