Durant ils firads da primavaira è il volumen da traffic en il chantun sa concentrà fermamain sin paucs dis e sin singulas uras. Las pli novas cifras mussan, che main che 40 pertschient pon vegnir attribuids al pur traffic da transit.

Las datas dals quintaders da traffic da l'Uffizi federal da vias (UVIAS) mussan in cler maletg: Mo ina part dals vehichels che entran il cumenzament dals firads da primavaira (Ascensiun e Tschuncaisma) sin la A13 a Bogn Ragaz en il chantun Grischun en direcziun sid, passan er tras il tunnel dal San Bernardin e bandunan lura puspè il chantun vers sid. Anc pli marcant è quest muster tar il traffic da return: A la fin dals firads bandunan sin la A13 a Bogn Ragaz bler dapli vehichels il chantun en direcziun nord che quai ch'i èn vegnids avant nà dal sid ed entrads en il tunnel dal San Bernardin.

La differenza dals dus quintaders mussa, che la cumpart dal pur traffic da transit importa main che 40 pertschient. Passa 60 pertschient dals vehichels restan en il chantun u bandunan il Grischun sur in'autra ruta.

Infrastructura al limit – mesiras per ils abitadis
Durant in di da lavur normal, tranter las 17.00 e las 18.00, passan en media var 2300 vehichels ils quintaders a Bogn Ragaz en direcziun nord. Sur Ascensiun e Tschuncaisma durant il temp da traffic maximal èn quai stads passa 3200 vehichels per ura. Cun quest volumen da traffic è cuntanschì il cunfin da capacitad da l'infrastructura da la via naziunala – la consequenza èn stagnaziuns da traffic e colonnas sco er traffic da guntgida.

Las mesiras da l'Uffizi da construcziun bassa (UCB) – sco dosar il traffic per regular la circulaziun – mussan l'effect giavischà e vegnan adattadas cuntinuadamain als basegns. La finamira da las mesiras è quella da minimar il traffic che guntgescha da l'autostrada sin la via chantunala, da meglierar la circulaziun dal traffic en ils vitgs, da garantir che las organisaziuns a glisch blaua ed il traffic public possian passar senza impediments sco er da proteger la populaziun locala cunter immissiuns supplementaras.

En stretg contact cun las vischnancas pertutgadas vegnan las mesiras sviluppadas vinavant. En vista als proxims onns ha il UCB installà a Zizers – en il rom d'ina emprova da pilot – in signal da traffic parzialmain automatisà, che duai gidar ad eruir, sch'igl è pussaivel e raschunaivel da manar quest signal en l'avegnir en moda parzialmain u totalmain automatisada (guardar communicaziun a las medias dals 10 da favrer 2025).

Graficas

Agid d'interpretaziun: La surfatscha grischa tranter las duas lingias mussa la cumpart da vehichels che resta en il chantun u che banduna quel sur in'autra ruta.

Grafica 1: Ascensiun 2025, traffic vers sid

Grafica 2: Ascensiun 2025, traffic da return vers nord

Grafica 3: Tschuncaisma 2025, traffic vers sid

Grafica 4: Tschuncaisma 2025, traffic da return vers nord

Infurmaziuns:

• Andreas Pöhl, manader Gestiun dal traffic, Uffizi da construcziun bassa, tel. +41 81 257 37 62 (cuntanschibel da las 14.00 fin las 15.30), e‑mail Andreas.Poehl@tba.gr.ch
• Reto Knuchel, inschigner chantunal, Uffizi da construcziun bassa, tel. +41 81 257 37 01 (cuntanschibel da las 14.00 fin las 15.00), e‑mail Reto.Knuchel@tba.gr.ch

Responsabladad: Uffizi da construcziun bassa