La Regenza ha nominà Gabriela Huber sco manadra dal Post da surveglianza per la protecziun da datas. La giurista vegn a cumenzar sia plazza il 1. da schaner 2026. Il Post da surveglianza per la protecziun da datas vegn creà en il rom da la nova Lescha davart la protecziun da datas dal chantun Grischun.
La Regenza ha elegì l'advocata da 57 onns Gabriela Huber sco manadra dal Post da surveglianza per la protecziun da datas. Gabriela Huber ha rimnà durant 25 onns experientschas en l'administraziun chantunala: l'emprim 6 onns sco collavuratura giuridica tar il Departament da giustia, segirezza e sanadad e suenter – fin oz – 19 onns en la direcziun dal Servetsch giuridic da l'Uffizi da sanadad.
Il nov Post chantunal da surveglianza per la protecziun da datas, ch'è dotà cun trais persunas, vegn stgaffì sin il 1. da schaner 2026. Il post è professiunalmain independent ed attribuì administrativamain a la Chanzlia chantunala. El surveglia l'applicaziun da las prescripziuns davart la protecziun da datas tenor la nova Lescha chantunala davart la protecziun da datas. Ultra da quai sensibilisescha el tranter auter las differentas gruppas en mira, sco per exempel las autoritads chantunalas, regiunalas e communalas, el fa recumandaziuns e tracta annunzias concernent violaziuns da la protecziun da datas.
Fotografia agiuntada:
Infurmaziuns:
Daniel Spadin, chancelier, Chanzlia chantunala, tel. +41 81 257 22 21 (cuntanschibel da las 11.00 fin las 12.00), e‑mail Daniel.Spadin@staka.gr.ch
Responsabladad: Regenza