Experts han giuditgà las ristgas e la responsabladad en connex cun la garanzia statala per la Banca Chantunala Grischuna (BCG). Tenor il «Rapport da ristga e da responsabladad 2025» dad Ernst & Young SA (EY) vegn in cas da responsabladad per il chantun Grischun valità vinavant sco fitg improbabel sut las supposiziuns formuladas. Il rapport è l'emprima etappa da la survista generala davart la BCG che la Regenza ha incumbensà l'onn 2024.
Dapi l'ultim rapport da ristga e da responsabladad l'onn 2021 ha la BCG cuntinuà cun ses curs da creschientscha cun ina summa da bilantscha da 35 milliardas francs (+12 %). Il motiv principal è l'augment dals credits, en spezial en il sectur da las pretensiuns ipotecaras. Ils agens meds imputabels èn s'augmentads sin circa 2,8 milliardas francs (+8 %). L'activitad commerziala da la BCG sa reparta sin diversas cumponentas dal retgav (fatschenta da tschains, fatschenta da cumissiuns e da servetschs) sco er sin martgads interchantunals ed extrachantunals. Grazia a questa repartiziun equilibrada vegn rinforzada la diversificaziun da las ristgas tenor il Rapport da ristga e da responsabladad 2025, e la stabilitad sco er la productivitad da la banca vegnan augmentadas.
Ina substanza da ristga consolidada garantescha stabilitad duraivla
Cun ina quota dal chapital total da 18,9 pertschient ademplescha la BCG las pretensiuns regulatoricas d'agens meds finanzials e dispona d'in surpli substanzial d'agens meds finanzials. Ultra da quai sa mova ella entaifer ses spazi strategic da las valurs visadas per la quota dal chapital central dir (quota CET-1) da 17,5 fin 22,5 pertschient. La BCG fa in management proactiv da las ristgas ed ha rinforzà vinavant sia substanza da ristga ils ultims onns. Da menziunar spezialmain èsi, che la BCG ha mess da la vart fin la fin da l'onn 2024 supplementarmain 372 milliuns francs per rinforzar sia substanza da ristga – in segn per in agir prudent e per stabilitad finanziala.
La BCG fa frunt a differents scenaris da stress
En il rom da l'analisa da las ristgas èn vegnids resguardads differents scenaris da stress, tranter auter ina «crisa turistica», ina «perdita da l'attractivitad da l'economia locala» sco er in scenari da basa pli rigurus cun perditas supplementaras en ils affars extrachantunals. Ils scenaris sa basan sin supposiziuns areguard probabilitads da perditas ed areguard reducziuns da valurs immobigliaras. Ils experts partan dal fatg che la banca revegnia en in tal cas a rectificaziuns da la valur ed a retenziuns, uschia ch'in cas da responsabladad effectiv vala vinavant sco fitg improbabel per il chantun.
Dispositiv da liquiditad da la Banca naziunala svizra (BNS) per cas d'urgenza
La BCG dispona d'in management da liquiditad cumplessiv e fa regularmain tests da stress da liquiditad per esser preparada per eventualas situaziuns da crisa. Ella stgaffescha ultra da quai las premissas per pudair retrair en l'avegnir liquiditad sur il nov dispositiv «Liquiditad cunter garanzias ipotecaras» (LCGI). Quest program è vegnì stgaffì da la BNS per sustegnair sistematicamain instituts da finanzas solvents en fasas dal martgà pretensiusas e per evitar stretgas da liquiditad.
Resultat fitg cuntentaivel en il rom da la survista generala davart la BCG
Cun gronda cuntentientscha ha la Regenza dal chantun Grischun prendì enconuschientscha dal Rapport da ristga e da responsabladad 2025. El conferma l'activitad commerziala solida e responsabla da la BCG. La banca è chapitalisada bain, stabila e contribuescha vinavant essenzialmain a la stabilitad finanziala en il chantun.
Il Rapport da ristga e da responsabladad 2025 è vegnì redigì dad EY sco societad d'audit legala da la BCG. Il rapport è l'emprima etappa da la survista generala davart la BCG che la Regenza ha incumbensà l'onn 2024. Ils resultats vegnan integrads en las ulteriuras lavurs per la survista generala.
Infurmaziuns:
Cusseglier guvernativ Martin Bühler, schef dal Departament da finanzas e vischnancas, tel. +41 81 257 32 05 (cuntanschibel da las 09.30 fin las 10.30), e‑mail Martin.Buehler@dfg.gr.ch
Responsabladad: Regenza