Ozendi vegnan bunamain tut las scolas popularas en il chantun Grischun manadas da direcziuns da scola. Per rinforzar questa funcziun impurtanta, lantscha l'Uffizi per la scola populara ed il sport a partir da l'onn da scola 2025/26 per l'emprima giada in program da sustegn. Cun questa purschida sistematica vegnan novas manadras e novs manaders da scola promovids ed accumpagnads sin lur emprims pass en la vita professiunala.
Il nov program da sustegn «Introducziun per mainascolas» da l'Uffizi per la scola populara ed il sport (USS) sa drizza a mainascolas da la scola populara, che cumenzan lur emprim onn da servetsch tar in purtader da scola en il chantun Grischun, sco er a mainascolas che cumenzan puspè lur lavur suenter in'absenza professiunala d'almain 5 onns.
Sustegnair il pass en la vita professiunala
Per s'orientar svelt en lur funcziun da gronda responsabladad obtegnan novas manadras e novs manaders da scola in sustegn sistematic durant la fasa d'introducziun. I va cunzunt per dumagnar professiunalmain las incumbensas multifaras che resultan en lur funcziun. La purschida da sustegn è concepida uschia, che las novas direcziuns da scola vegnan preparadas en moda uschè effizienta e pratica sco pussaivel per las pretensiuns specificas da la scola populara grischuna. «Las manadras ed ils manaders da scola procuran che la scola funcziunia bain sco unitad: Ellas ed els mainan las persunas d'instrucziun, sviluppan vinavant la scola en moda prospectiva e stgaffeschan in ambient, nua che las scolaras ed ils scolars emprendan cun success», declera la manadra da l'uffizi Chantal Marti-Müller.
Basas e colliaziun
Curt suenter il cumenzament dal nov onn da scola survegnan las participantas ed ils participants ina survista cumpacta davart la scola populara grischuna e davart las basas legalas. Ellas ed els erueschan las dumondas centralas da la funcziun da mainascola ed emprendan d'enconuscher persunalmain las persunas da contact dal USS ch'èn responsablas per ellas ed els. L'introducziun cumpiglia duas occurrenzas obligatoricas che duran totalmain in di e mez. Plinavant datti ulteriuras purschidas. La purschida «Introducziun per mainascolas» cumplettescha las cussegliaziuns specificas individualas dal USS ch'existan gia e sa basa concepziunalmain sin il program da sustegn per l'introducziun professiunala da novas persunas d'instrucziun, ch'è gia s'etablì dapi passa 10 onns cun success en il chantun Grischun.
Infurmaziuns:
Dr. Chantal Marti-Müller, manadra da l'Uffizi per la scola populara ed il sport, tel. +41 81 257 27 50 (cuntanschibla da las 14.00 fin las 15.00), e‑mail Chantal.Marti@avs.gr.ch
Responsabladad: Uffizi per la scola populara ed il sport