Ils 11 da favrer 2025 ed ils 11 da mars 2025 han gì lieu ils examens d'admissiun chantunals per entrar en ina scola media grischuna. 532 (l'onn avant: 517) scolaras e scolars han dumagnà l'admissiun en ina da las nov scolas medias grischunas cun las partiziuns gimnasi, scola media commerziala, scola media d'informatica e scola media spezialisada.

Tut en tut han 850 scolaras e scolars frequentà ils examens d'admissiun chantunals en ina da las nov scolas medias grischunas. L'onn precedent eran quai 837 candidatas e candidats.

Examen d'admissiun per la 1. classa dal gimnasi da lunga durada
Da las 371 scolaras e scolars da la 6. classa primara ch'èn sa preschentads per l'examen d'admissiun han 223 (var 60 pertschient) dumagnà l'admissiun en la 1. classa dal gimnasi da 6 onns (l'uschenumnà gimnasi da lunga durada). Areguard il total da scolaras e scolars da la 6. classa primara en il Grischun (1745) importa la quota da giuvenils admess a la 1. classa dal gimnasi da lunga durada 12,78 pertschient. La quota d'admissiun da l'onn precedent era cun 13,4 pertschient in zic pli auta.

Examen unifitgà per la 3. classa gimnasiala sco er per la 1. classa da la scola media commerziala, d'informatica u spezialisada
Da las 479 scolaras e scolars che han fatg quest onn l'examen unifitgà per l'admissiun en la 3. classa gimnasiala u en la 1. classa da la scola media commerziala, da la scola media d'informatica u da la scola media spezialisada, han 188 (39,25 pertschient) dumagnà l'admissiun en la 3. classa gimnasiala e 121 (25,26 pertschient) l'admissiun en la 1. classa da la scola media commerziala, d'informatica u spezialisada. La quota d'admissiun per entrar en la 3. classa gimnasiala importa quest onn 11,07 pertschient da l'annada da referenza ed è pia in zic pli auta che l'onn precedent (10,5 pertschient).

Success tar ils examens finals a las scolas medias dal Grischun
Tut en tut han 518 scolaras e scolars absolvì ils examens finals en ina da las nov scolas medias dal Grischun ed a la Scola svizra Rahn Education a Milaun (360 maturitads gimnasialas, 59 diploms da scola media professiunala, 66 maturitads spezialisadas e 33 diploms da scola media commerziala). 507 scolaras e scolars han gì success ed han pudì prender encunter las ultimas emnas lur attestat final.

Infurmaziuns:

Regina Just Brodbeck, manadra da la partiziun Scolas medias, Uffizi per la furmaziun media-superiura, tel. +41 81 257 61 69 (cuntanschibla da las 09.00 fin las 11.30), e‑mail Regina.Just@ahb.gr.ch

Responsabladad: Uffizi per la furmaziun media-superiura