Glindesdi proxim cumenzan las lavurs da construcziun da la via dal Güglia (H3a) sin il traject Rosenhügel – Hohenbühlweg a Cuira. Las lavurs duran stgars 3 onns e vegnan realisadas en etappas. Ils custs totals importan var 6 milliuns francs.

La via dal Güglia fa part da la rait naziunala da vias principalas. L'axa da traffic fermamain frequentada è da gronda impurtanza per il traffic da transit sco er per l'access a la regiun turistica Lai – Valbella. Il traject Rosenhügel – Hohenbühlweg è circa 500 meters lung ed ha cleras mancanzas architectonicas. Cun la correcziun da la via planisada renovescha l'Uffizi da construcziun bassa (UCB) la surstructura da la via e schlargia la via a 7 meters.

Focus durant l'emprim onn
L'emprim onn da construcziun 2025 vegn cumenzada l'emprima etappa da renovaziun suenter l'installaziun dal plazzal. Quella cumpiglia l'engrondiment dal trassé da la vart da la val sco er l'adattaziun da duas construcziuns da sustegn. La costa stippa e il spazi limità pretendan ina realisaziun en etappas e tecnicamain pretensiusa. Durant il temp da construcziun è la via charrabla almain sin in vial per minimar uschè fitg sco pussaivel las restricziuns per las vischinas ed ils vischins sco er per las participantas ed ils participants dal traffic.

Realisaziun en etappas fin l'onn 2027
Ils onns 2026 e 2027 vegni cuntinuà cun cumplettar la via al profil traversal regular da 7 meters. Ultra da quai vegnan realisadas la renovaziun da las fermadas da bus tenor ils basegns da las persunas cun impediments, la meglieraziun dal trassé e la visibilitad sco er mesiras per il traffic betg motorisà.

Pertge dura il project 3 onns?
La durada totala dal project resulta da plirs facturs: Las lavurs vegnan fatgas sut stretgas relaziuns da spazi e durant ch'il traffic circulescha, e quai en in terren stip ed en in territori d'abitadi. Il project che ha ina lunghezza da 500 meters, cumpiglia plinavant var 6000 meters conducts. Quai influenzescha considerablamain il temp da construcziun.

Visitas guidadas sin ils plazzals per persunas interessadas: www.tba.gr.ch/rosenhuegel
En il decurs dal project porscha il UCB per persunas interessadas visitas guidadas sin ils plazzals. Ellas survegnan ina invista dal progress da las lavurs da construcziun e da las sfidas al lieu. Las emprimas visitas guidadas èn previsas per l'atun 2025. Las datas vegnan publitgadas sin www.tba.gr.ch/rosenhuegel.

Infurmaziuns:

René Simeon, schef Construcziun da vias, Uffizi da construcziun bassa, tel. +41 81 257 37 85 (cuntanschibel da las 10.00 fin las 12.00), e‑mail Rene.Simeon@tba.gr.ch

Responsabladad: Uffizi da construcziun bassa