En il chantun Grischun han 38 fugitivas e fugitivs giuvens terminà questa stad cun success lur emprendissadi. Els tuts èn vegnids accumpagnads dal Post spezialisà per l'integraziun. Cun lur diplom èn las absolventas ed ils absolvents ussa preparads bain per s'etablir sin il martgà da lavur svizzer.

Cun l'accumpagnament dal Post spezialisà per l'integraziun han tut en tut 31 umens e 7 dunnas terminà cun success lur furmaziun professiunala da basa en ils secturs artisanadi, tecnica d'edifizis, logistica, sanadad e tgira. Totalmain èn vegnids acquistads 25 attestats federals da qualificaziun (AFQ), 12 attestats federals da furmaziun professiunala (AFP) ed in diplom d'ina scola spezialisada superiura (SSS) – in ferm signal che mussa, che l'entrada en il mund da lavur svizzer è reussida. «Las prestaziuns da mintgina da questas persunas giuvnas da professiun èn impressiunantas», di Felix Birchler, manader dal Post spezialisà per l'integraziun dal Grischun. «Ellas n'han betg mo dumagnà lur scolaziun professiunala, mabain er surmuntà barrieras linguisticas e chattà lur via en il mund da lavur svizzer.»

Circa dus terzs da las absolventas e dals absolvents derivan da l'Afganistan e da l'Eritrea, in terz da l'Iran, da Mali, da Sri Lanka, da la Siria e dal Tibet. Lur punct cuminaivel è: Cun engaschament, perseveranza e grond sustegn han els chattà lur plaz en la vita professiunala. Ina gronda part da las absolventas e dals absolvents ha gia chattà ina soluziun da cuntinuaziun – saja quai en furma d'ina plazza da lavur fixa u d'ina scolaziun cuntinuanta.

Ina finiziun da l'emprendissadi cun effect da signal
Senza la confidenza e l'avertadad dals manaschis d'emprendissadi en il chantun na fissan ils success da questas persunas giuvnas creschidas betg pussaivels. Tras il jobcoaching dal Post spezialisà per l'integraziun èn las emprendistas ed ils emprendists vegnids accumpagnads durant lur entir temp da scolaziun. Questa cumbinaziun d'accumpagnament individual, engaschament dal manaschi ed avertadad sociala è la basa per che la lavur d'integraziun funcziunia. «La furmaziun e la lavur èn clavs impurtantas per l'integraziun. La terminaziun da quests emprendissadis mussa quai en moda impressiunanta. L'integraziun reussescha là, nua che persunas lavuran cuminaivlamain», cuntinuescha Birchler.

Fotografia agiuntada:

Infurmaziuns:

Felix Birchler, manader dal Post spezialisà per l'integraziun / incumbensà chantunal d'integraziun, Uffizi da migraziun e da dretg civil, tel. +41 81 257 36 84 (cuntanschibel da las 09.00 fin las 12.00), e‑mail Felix.Birchler@afm.gr.ch

Responsabladad: Uffizi da migraziun e da dretg civil