En il chantun Grischun entran oz passa 19 000 scolaras e scolars puspè en las stanzas da scola da las scolas popularas. Il cusseglier guvernativ Jon Domenic Parolini e la manadra da l'Uffizi per la scola populara ed il sport, Chantal Marti-Müller, han visità oz la festa d'avertura a Trin. Al cumenzament da la scola vegnan preschentadas cifras actualas davart il dumber da scolaras e scolars, davart l'occupaziun da las plazzas da persunas d'instrucziun e davart la concessiun da permissiuns da dar scola.

Oz cumenza per la gronda part da las scolas popularas dal Grischun l'onn da scola 2025/26 – uschia er per la scola bilingua a Trin. Las var 130 scolaras e scolars da la scolina e dal stgalim primar sco er lur geniturs ed il persunal d'instrucziun han festivà cuminaivlamain quest di spezial. A chaschun da l'avertura uffiziala han la presidenta dal cussegl da scola Silvia Capatt ed il mainascola Christian Erni beneventà cordialmain tut las persunas preschentas, particularmain las scolaras ed ils scolars dal 1. onn da scolina resp. da scola. Er il cusseglier guvernativ Jon Domenic Parolini e la manadra da l'Uffizi per la scola populara ed il sport (USS), Chantal Marti-Müller, han dastgà participar sco giasts. «Oz cumenza per vus ina gronda aventura – ch'il plaschair d'emprender possia accumpagnar vus durant vossa entira vita», ha il cusseglier guvernativ Jon Domenic Parolini giavischà a las novas scolaras ed als novs scolars per lur via futura. Suenter la pausa han els visità l'instrucziun en la segunda classa primara ed exprimì a las scolaras ed als scolars lur megliers giavischs per l'emprim di da scola.

Pitschnas classas e pensum parzial
L'onn da scola passà 2024/25 ha la scola populara grischuna dumbrà var 19 200 scolaras e scolars. Da quels han 18 883 frequentà la scola regulara (incl. scolaziun speziala integrativa) e 335 ina instituziun da la scolaziun speziala. Ina classa da la scola regulara aveva en media 15 scolaras e scolars. La tendenza mussa ina leva reducziun. Circa 2400 persunas d'instrucziun han instruì en il sectur da la scola regulara. Il grad d'occupaziun era – guardà sur tut ils stgalims – en media circa 68 pertschient ed è sa reducì levamain durant ils ultims 10 onns.

Paucas plazzas libras
Sco gia l'onn avant sa mussa in maletg stabil tar l'occupaziun da las plazzas da persunas d'instrucziun: Tenor las indicaziuns dals purtaders da la scola regulara eran il cumenzament da fanadur 2025 tschintg plazzas betg occupadas per il cumenzament dal nov onn da scola. Tut en tut correspunda quai a stgars trais plazzas a temp cumplain. Per l'onn da scola 2025/26 èn vegnidas emessas 467 permissiuns da dar scola en il sectur da la scola regulara. Quai correspunda ad ina reducziun da 13 pertschient en cumparegliaziun cun l'onn da scola precedent. Il pensum da lavur d'ina persuna d'instrucziun cun ina permissiun da dar scola importa en media circa 44 pertschient.

Engraziament a las direcziuns da scola ed a las persunas d'instrucziun
Il Departament d'educaziun, cultura e protecziun da l'ambient e l'Uffizi per la scola populara ed il sport engrazian a tut las persunas d'instrucziun, direcziuns da scola ed autoritads da scola. Grazia a lur engaschament survegnan tut las scolaras e tut ils scolars da la scola populara grischuna ina furmaziun d'auta qualitad. Per il nov onn da scola giavischain nus ina buna realisaziun da la revisiun parziala da la Lescha davart las scolas popularas sco er bleras experientschas cuminaivlas ed instructivas. «Il plaschair e las spetgas da las scolaras e dals scolars l'emprim di da scola motiveschan e regordan blers a l'agen temp da scola», uschia la manadra dal USS Chantal Marti-Müller.

Infurmaziuns:

• Cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01 (cuntanschibel da las 16.00 fin las 16.30), e‑mail Jondomenic.Parolini@ekud.gr.ch
• Dr. Chantal Marti-Müller, manadra da l'Uffizi per la scola populara ed il sport, tel. +41 81 257 27 50 (cuntanschibla da las 14.00 fin las 15.00), e‑mail Chantal.Marti@avs.gr.ch

Responsabladad: Departament d'educaziun, cultura e protecziun da l'ambient