La Regenza vul er en l'avegnir sustegnair finanzialmain plans e projects impurtants da l'economia regiunala per rinforzar il sistem turistic. Per quest intent duai il credit d'impegn general existent vegnir augmentà per 35 milliuns francs. La Regenza ha deliberà la missiva per mauns dal Cussegl grond per la tractar en la sessiun d'october 2025.
Sut il titel «Infrastructuras relevantas per il sistem» ha la Regenza garantì respectivamain empermess ils onns 2017 fin 2023 var 45 milliuns francs per 22 projects. Il credit d'impegn correspundent na dispona actualmain da nagins meds finanzials libramain disponibels pli. Sin fundament da las experientschas positivas da l'emprima perioda da pajament ha il Cussegl grond acceptà en la sessiun da favrer 2025 ina incumbensa en ina furma modifitgada. La Regenza è vegnida incumbensada d'elavurar ina soluziun concernent l'augment dal credit d'impegn general.
L'import da 35 milliuns francs correspunda a la summa ch'il Cussegl grond ha reservà l'onn 2020 – entaifer il credit d'impegn general – per promover l'avertura cun bindel ultralad e che na stat dapi lura betg pli a disposiziun per promover infrastructuras relevantas per il sistem. Cun la missiva qua avant maun duain ils meds finanzials per infrastructuras relevantas per il sistem vegnir augmentads sin ils 80 milliuns francs oriunds.
La promoziun vertenta è sa cumprovada
La promoziun da projects impurtants per l'economia regiunala cun contribuziuns à fonds perdu per rinforzar il sistem turistic è sa cumprovada ils ultims onns. Uschia han pudì vegnir pajadas contribuziuns chantunalas substanzialas per finanziar quests projects. Ultra da quai èn er vegnids promovids tscherts projects innovativs che correspundan ad in basegn da l'economia generala. Differentas regiuns han uschia survegnì impuls per il svilup dal turissem e da la regiun.
Las contribuziuns chantunalas ch'èn vegnidas garantidas fin ussa per infrastructuras relevantas per il sistem pertutgan differentas vischnancas e regiuns en il chantun Grischun (guardar illustraziun).
Meds finanzials supplementars sustegnan la strategia turistica
La Regenza vesa er per ils proxims onns in basegn da pudair promover ils projects d'infrastructura cun in effect chantunal sut il titel «Infrastructuras relevantas per il sistem». Cun impuls sistematics vul la Regenza sustegnair er vinavant projects impurtants per il turissem e per il svilup regiunal ed uschia contribuir a las finamiras strategicas da la strategia turistica dal Grischun.
Agiunta:
Missiva «Credit supplementar al credit d'impegn general per promover infrastructuras relevantas per il sistem»
Infurmaziuns:
President da la Regenza Marcus Caduff, schef dal Departament d'economia publica e fatgs socials, e‑mail Marcus.Caduff@dvs.gr.ch, pussaivladad da far intervistas en il rom da l'inscunter mensil da la Regenza cun las medias da las 11.00 fin las 11.30
Responsabladad: Regenza