La Cumissiun dal Cussegl grond per giustia e segirezza (CGS) ha predeliberà la missiva da la Regenza tar la revisiun parziala da la Lescha da polizia e sustegna las mesiras da la polizia da segirezza previsas en tala. En il center stat l'introducziun d'in management chantunal da smanatschas.
Sut la direcziun dal president da la cumissiun Bruno W. Claus ed en preschientscha dal cusseglier guvernativ Peter Peyer, schef dal Departament da giustia, segirezza e sanadad, ha la CGS predeliberà la missiva da la Regenza tar la revisiun parziala da la Lescha da polizia. Questa actualisaziun dal dretg da polizia cuntegna trais novs aspects da la polizia da segirezza. Tut ils trais aspects han chattà il consentiment da la cumissiun predeliberanta.
Management chantunal da smanatschas (MCS)
Instituziuns sco l'Uffizi da bajegiar da Turitg ed il parlament da Zug u lieus sco Erfurt e Graz collia la societad oz cun terribels acts da violenza. Il MCS sco nov instrument da la polizia da segirezza duai gidar ad impedir tals grevs acts da violenza intenziunads. I na va dentant betg mo per la violenza cunter autoritads e per acts d'amoc, mabain er per la violenza a chasa e per l'extremissem violent ed il radicalissem. Cun il MCS duai vegnir sviluppà in sistem che gida e garantescha da percepir a temp ils signals d'avertiment che precedan savens a tals acts. Uschia duai el pussibilitar a la Polizia chantunala d'identifitgar a temp las persunas prontas d'utilisar violenza. Per quest intent dovri in barat da datas correspundent tranter las autoritads.
La CGS sustegna unanimamain l'introducziun d'in MCS. Ella renda dentant attent, che las persunas incumbensadas cun il MCS stoppian agir en moda fitg conscienziusa e cun gronda responsabladad, perquai che la protecziun da la publicitad ha per consequenza intervenziuns en la sfera privata ed intima da persunas.
Mesiras cunter violenza, smanatschas e persecuziuns
In ulteriur punct dal project tracta la pussaivladad da la Polizia chantunala da pronunziar scumonds d'areal, d'avischinaziun e da contact cunter persunas. Quai, sch'ins sto supponer – sin basa da las circumstanzas – ch'ellas commettian in malfatg cunter il corp, cunter la vita, cunter l'integritad sexuala u cunter la libertad u ch'ellas persequiteschian insatgi (stalking). Er questas novaziuns en la lescha vegnan sustegnidas unanimamain da la cumissiun predeliberanta.
Exclusiun
Sco cumplettaziun da la pussaivladad gia existenta da la Polizia chantunala da trametter davent persunas da tscherts lieus, duai ella survegnir da nov la pussaivladad d'excluder persunas da tscherts territoris, lieus, objects u terrens. Tenor la proposta da la Regenza duai quai esser pussaivel per ina durada da fin 14 dis. La cumissiun propona qua unanimamain in augment sin 30 dis. Tenor l'avis da la CGS è l'exclusiun in instrument impurtant – cunzunt en connex cun la criminalitad da drogas – che duai pussibilitar a la Polizia chantunala d'excluder persunas per in temp pli lung da tscherts lieus u d'in territori da la citad.
La finamira communabla da tut questas mesiras proponidas è quella, che la Polizia chantunala possia proceder vinavant en moda efficazia ed effizienta cunter acts criminals ed impedir tals en il meglier cas. La CGS propona al Cussegl grond d'acceptar la revisiun parziala da la lescha da polizia.
Il Cussegl grond vegn a tractar questa fatschenta en la sessiun d'avust 2025.
Infurmaziuns:
President da la cumissiun Bruno W. Claus, tel. +41 81 300 33 70
Responsabladad: Cussegl grond / Cumissiun per giustia e segirezza