La Regenza propona al Cussegl grond da sustegnair persunas che assistan lur confamigliars cun ina contribuziun mensila fixa da 300 fin 600 francs. La Regenza ha deliberà la missiva cun il sboz da lescha respectiv per mauns dal Cussegl grond. Quel vegn a tractar il project previsiblamain en la sessiun d'october.
En il Grischun surpiglian bleras persunas mintga di la responsabladad per geniturs attempads, per partenarias e partenaris malsauns u per uffants cun impediments. Savens fan ellas quai senza ina scolaziun correspundenta, senza ina indemnisaziun finanziala adequata e cun in engaschament persunal considerabel. En il Grischun duai questa furma da la lavur da tgira vegnir indemnisada en l'avegnir. Ella ha numnadamain grondas consequenzas per la vita sociala e professiunala e per la sanadad da las persunas pertutgadas. «Las persunas che assistan lur confamigliars èn ina pitga impurtanta en il sistem da sanadad. Cun lur lavur distgargian ellas er las instituziuns», di il cusseglier guvernativ Peter Peyer, schef dal Departament da giustia, segirezza e sanadad.
Las persunas che assistan lur confamigliars èn dentant er confruntadas cun numerusas sfidas: Quai pon esser grevezzas finanzialas, problems da cumpatibilitad tranter l'assistenza e l'activitad da gudogn u ina spussada psichica e fisica. Pertutgadas èn per gronda part dunnas – ellas surpiglian il pli savens questa lavur da tgira. Pervia da questa activitad èn ellas er pertutgadas pli savens da povradad en la vegliadetgna, d'interrupziuns da la carriera e d'isolaziun sociala.
Questa revisiun parziala da la Lescha per promover la tgira da persunas malsaunas e l'assistenza da persunas attempadas e da persunas che basegnan tgira (Lescha per promover la tgira da persunas malsaunas, LTM; DG 506.000) duai stgaffir las basas legalas per pajar contribuziuns d'assistenza mensilas.
Almain 8 uras tgira per emna
Cun la revisiun parziala da la Lescha per promover la tgira da persunas malsaunas duain vegnir fixads la cumpetenza, il rom da l'autezza da las contribuziuns, las premissas per contribuziuns, ils process administrativs sco er la durada dal dretg. L'autezza definitiva da las contribuziuns vegn fixada da la Regenza en l'Ordinaziun tar la Lescha per promover la tgira da persunas malsaunas.
Ella propona, ch'i duai esser pussaivel da dumandar contribuziuns, sche la persuna che dovra assistenza ha ses domicil en il chantun Grischun e n'abita betg en ina chasa da persunas attempadas e da tgira u en ina instituziun sumeglianta. Ultra da quai sto il temp per l'assistenza importar en media almain 8 uras per emna e l'assistenza sto vegnir prestada gratuitamain durant ina perioda da pli che 2 mais. L'assistenza cumpiglia tranter auter las lavurs quotidianas en il tegnairchasa, il sustegn per la mobilitad, per sa nutrir u per l'igiena dal corp ubain activitads administrativas.
La revisiun parziala da la Lescha per promover la tgira da persunas malsaunas sa basa sin duas incumbensas dal Cussegl grond (incumbensa Degiacomi, incumbensa Caduff). Per la realisaziun tecnica vegni quintà cun circa in onn. Correspundentamain duai la revisiun parziala entrar en vigur il 1. da schaner 2027.
Agiunta:
Missiva
Infurmaziuns:
Cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01 (cuntanschibel da las 12.30 fin las 13.30), e‑mail medienstelle@djsg.gr.ch
Responsabladad: Regenza