En il sectur da la Ruinaulta installescha l'Uffizi da construcziun bassa raits da protecziun cunter crudadas da crappa, quai per proteger in plazzal planisà. Per quest intent sto la Via da Versomi vegnir serrada per tut il traffic mardi e mesemna, ils 26 e 27 d'avust 2025, durant il di. Il settember sto la via supplementarmain vegnir serrada durant la notg.
Durant la primavaira 2026 vul l'Uffizi da construcziun bassa dal Grischun (UCB) renovar ils mirs da sustegn e da balustrada en il sectur da la Ruinaulta. Sin quest traject han ins pli e pli savens constatà crudadas da crappa. Per garantir la segirezza da las collavuraturas e dals collavuraturs sin il plazzal montescha l'Uffizi da construcziun bassa raits cunter crudadas da crappa, quai sin in traject da via da var 100 meters lunghezza. Las paraids-crap praticamain verticalas han in'autezza da fin 75 meters, mesirà davent dal nivel da la via.
Serrada durant dus dis
Mardi e mesemna, ils 26 e 27 d'avust 2025, vegn la via en il sectur dal plazzal serrada cumplettamain durant il di (da las 08.00 fin las 11.30 e da las 13.30 fin las 17.00). Las participantas ed ils participants dal traffic pon sviar sur Flem. Las organisaziuns a glisch blaua pon passar da tut temp il plazzal. Ciclistas e ciclists sco er pedunas e peduns na pon betg passar il plazzal.
Serrada durant la notg dals 31 d'avust fin ils 26 da settember 2025
Per minimar uschè fitg sco pussaivel las restricziuns per las participantas ed ils participants dal traffic, vegnan ulteriuras lavurs fatgas durant la notg. Dals 31 d'avust fin ils 26 da settember 2025 è la via perquai serrada da dumengia saira fin venderdi a bun'ura mintgamai tranter las 20.00 e las 05.00. Ciclistas e ciclists sco er pedunas e peduns na pon betg passar il plazzal. Tranter las 23.30 e las 00.00 vegn la via dada liber per 30 minutas. Las fins d'emna resta la via charrabla sco usità.
Visualisaziuns:
Visualisaziun da las raits da protecziun cunter crudadas da crappa (betg confurm a la scala)..
© InfraGeo SA
Infurmaziuns:
Ralf Hartmann, schef dal district 1 Cuira, Uffizi da construcziun bassa, tel. +41 81 257 57 01 (cuntanschibel da las 09.00 fin las 10.00), e‑mail Ralf.Hartmann@tba.gr.ch
Responsabladad: Uffizi da construcziun bassa