Il chantun Grischun, represchentà tras il Departament d'educaziun, cultura e protecziun da l'ambient (DECA), ha suttascrit cun la Scola spezialisada superiura da la Svizra Sidorientala (ibW) ina cunvegna da prestaziun per realisar a partir dal 1. da schaner 2026 ils curs per furmaturas e furmaturs professiunals. La cunvegna vala l'emprim per 4 onns e po vegnir prolungada duas giadas per mintgamai 2 onns.

Furmaturas e furmaturs professiunals giogan ina rolla centrala en il sistem dual da la furmaziun professiunala da la Svizra. Ellas ed els accumpognan e promovan emprendistas ed emprendists durant lur furmaziun professiunala da basa en il manaschi d'emprendissadi. Per pudair exequir questa incumbensa en moda cumpetenta e confurm a la lescha è necessaria ina qualificaziun correspundenta. Per quest intent porscha il chantun in curs da 40 uras per furmaturas e furmaturs professiunals. Il matg 2025 è il plan d'instrucziun chantunal da la Conferenza svizra dals uffizis per la furmaziun professiunala (CSFP) vegnì adattà. Da nov vegni renvià als secturs tematics transversals sco er a l'impurtanza da discussiuns da cas e dal barat d'experientschas. Ultra da quai è vegnida integrada ina nova cumpetenza per garantir la qualitad da l'atgna activitad da scolaziun.

Publicaziun uffiziala ed attribuziun a la ibW
Ils curs per furmaturas e furmaturs professiunals èn vegnids surdads en il Grischun en il rom d'ina procedura da publicaziun uffiziala. Durant l'emprim quartal da l'onn 2025 èn las offertas vegnidas rimnadas e suenter examinadas e valitadas d'in team d'evaluaziun da l'Uffizi per la furmaziun professiunala. Duas instituziuns, che avevan inoltrà tuttas duas offertas d'auta qualitad, èn vegnidas envidadas da sa preschentar. L'attribuziun ha la finala survegnì la ibW, da la quala la purschida ha pudì persvader. Ultra da la fitg buna relaziun tranter il pretsch e la prestaziun èn stadas decisivas cunzunt la garanzia cumplessiva da la qualitad, la cumpetenza professiunala cumprovada e la fermezza organisatorica da la ibW. Cun concluder la cunvegna da prestaziun cun la ibW procura la Regenza per ina purschida confurma als basegns per la scolaziun da furmaturas e furmaturs professiunals en il Grischun.

Extensiun da la purschida, formats da curs moderns e cuvrida regiunala
«Cun l'attribuziun po la ibW cuntinuar e sviluppar vinavant sia activitad sco purschidra dals curs per furmaturas e furmaturs professiunals en il chantun Grischun a partir da l'onn 2026», declera Stefan Eisenring, directur da la ibW. Planisads èn formats da curs flexibels en l'uschenumnà model da blended-learning che cumbinescha l'instrucziun da preschientscha e l'instrucziun online. «Uschia garantin nus ina scolaziun moderna che correspunda als basegns da furmaturas e furmaturs professiunals en tut las regiuns linguisticas dal chantun», accentuescha il cusseglier guvernativ Jon Domenic Parolini.

Dapli infurmaziuns:

Curs per furmaturas e furmaturs professiunals en manaschis d'emprendissadi

Fotografia:

Da sanestra: Stefan Eisenring, directur da la ibW, Jürg Michel, president da l'uniun purtadra ibW, cusseglier guvernativ Jon Domenic Parolini, schef dal DECA, Curdin Tuor, manader da l'Uffizi per la furmaziun professiunala

Infurmaziuns:

• Cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambientDepartament d'educaziun, cultura e protecziun da l'ambient, tel. +41 81 257 27 01 (cuntanschibel da las 15.00 fin las 15.30), e‑mail Jondomenic.Parolini@ekud.gr.ch
• Stefan Eisenring, directur ibW Scola spezialisada superiura da la Svizra Sidorientala, tel. +41 81 403 33 22 (cuntanschibel da las 15.30 fin las 18.00), e‑mail Stefan.Eisenring@ibw.ch

Responsabladad: Departament d'educaziun, cultura e protecziun da l'ambient