La Regenza ha concedì a la Swisspower SA, sut tschertas cundiziuns, la permissiun per construir in nov implant fotovoltaic grond alpin en la vischnanca da Tavau. La Swisspower SA represchenta la Energie Wasser Berna, las IWB Industrielle Werke Basilea e l'Ovra electrica Tavau SA sco manadra generala dal project.

Tar il project «Alpin Parsenn» sa tracti da l'implant fotovoltaic grond ch'è planisà en il territori Meierhof Tälli al pe sid dal Totalphorn en la vischnanca da Tavau. Il territori dal project è dividì en plirs perimeters parzials. Entaifer quels èsi previs da construir e da manar l'implant fotovoltaic grond sco er d'endrizzar la colliaziun necessaria cun la rait. Sin ina surfatscha da circa 13,98 hectaras duain – tenor il project– totalmain 1493 maisas modularas producir circa 12,1 uras gigawatt (GWh) energia per onn. Questas maisas vegnan munidas cun moduls fotovoltaics che tiran a niz tant la radiaziun dal sulegl directa sco er la radiaziun reflectada per producir electricitad.

L'implant fotovoltaic grond alpin planisà duai vegnir plazzà en il territori da sport d'enviern Parsenn, nua che infrastructuras èn gia avant maun. L'avertura logistica è previsa sur vias d'access existentas. Supplementarmain duain vegnir utilisads helicopters sco er chavaterras movibels per ina montascha minimalmain invasiva. Il project era vegnì approvà da las votantas e dals votants da la vischnanca da Tavau a chaschun da la votaziun dals 17 da december 2023.