Dapi la crudada da la «insla» la stad 2023 è la bova da Brinzauls s'accelerada fermamain. La periclitaziun tras crudadas da grippa è plinavant s'agravada danovamain dapi il november 2024 cun la «Gonda sura» sco er cun il svilup actual dal «Plateau Ost». Pervia da questa situaziun da ristga e pervia da la gronda chargia per la populaziun evacuada dumonda la Regenza il Cussegl grond in credit d'impegn da 50 milliuns francs. Quest credit duai pussibilitar ina dischlocaziun preventiva a las abitantas ed als abitants che vulan sa dischlocar.

Durant ils ultims bundant 15 onns è la bova da Brinzauls s'accelerada per part extraordinariamain fitg. L'atun 2024 han ins mesirà en il vitg ratas da moviment da stgars 250 centimeters per onn. Correspundentamain hai dà donns pli e pli gronds vi d'edifizis ed infrastructuras, ed i na po betg vegnir exclus, che singuls u plirs edifizis daventan inabitabels. Ultra da quai èn ils custs per manar e per mantegnair ils stabiliments d'infrastructura creschids considerablamain. La periclitaziun tras la dimensiun da la bova permanenta vegn surpostada d'ina periclitaziun latenta tras process da crudada pussaivels. Questa periclitaziun tras crudadas da grippa è s'accentuada la stad 2023 cun la crudada da la «insla» ed a partir dal november 2024 cun la «Gonda sura» sco er cun il svilup actual dal «Plateau Ost» (stadi: avust 2025). L'evacuaziun da Brinzauls, che la vischnanca d'Alvra ha ordinà il matg/zercladur 2023 per motivs da segirezza, sco er l'evacuaziun che dura dapi il november 2024, èn ina gronda sfida per tut ils posts participads. Cunzunt per la populaziun pertutgada da Brinzauls signifitgan las evacuaziuns situaziuns rigurusas e fitg engrevgiantas.

Annunzia fin la fin da settember
Pervia da la situaziun da ristga ch'exista actualmain pervia da la periclitaziun tras crudadas potenzialas, duain las persunas pertutgadas survegnir la pussaivladad da bandunar preventivamain il vitg da Brinzauls. Per il mument prepara la vischnanca d'Alvra in project forestal correspundent per dischlocar edifizis e stabiliments en lieus segirs. Fin la fin da settember 2025 pon las persunas interessadas s'annunziar en moda lianta per ina dischlocaziun parziala preventiva. Sin basa da l'interess ch'è vegnì annunzià fin ussa, vegni fatg quint cun custs totals da ca. 55,6 milliuns francs per quest project. Cun il credit d'impegn che la Regenza dumonda il Cussegl grond pon vegnir cuvrids 90 pertschient dals custs totals. Resguardond la contribuziun federala minimala da 35 pertschient importa la grevezza netta maximala per il chantun Grischun 55 pertschient.

La gallaria da drenascha mussa in emprim effect positiv
Dapi il zercladur 2024 vegni ultra da quai cuntinuà cun la construcziun da las gallarias da drenascha, ch'èn ina prolungaziun da la gallaria da sondagi ch'è vegnida terminada il 2023. Mesiraziuns actualas mussan, ch'ils sondagis da drenascha, ch'èn vegnids fatgs en il sectur da la «bova Vitg» fin il cumenzament da la stad 2025, han franà fermamain ils moviments da la bova a sut 100 centimeters per onn (stadi: avust 2025, la tendenza mussa in'ulteriura reducziun). I vegni supponì, ch'er ils cumpartiments da la «bova Muntogna» sa calman, sche la «bova Vitg» vegn franada. Questa influenza n'è actualmain dentant anc betg quantifitgabla.

La gallaria da drenascha è vegnida concepida da bel principi cun la finamira da reducir il privel per l'entira infrastructura pertutgada. L'infrastructura na cumpiglia betg mo il vitg da Brinzauls e las infrastructuras communalas, mabain er implants d'impurtanza regiunala, chantunala e naziunala (vias chantunalas, trassé da la Viafier retica, lingias da provediment da la swissgrid, axpo ed ewz e.u.v.). Pervia da las experientschas positivas en connex cun la gallaria da drenascha sco er en vista al fatg, ch'i dat – ultra dal vitg da Brinzauls – er auters acturs che profiteschan d'ina stabilisaziun duraivla da la bova da Brinzauls, vegni presumà oz (avust 2025), che la construcziun da la gallaria da drenascha vegnia terminada sco planisà fin la fin dal 2027, independentamain dal svilup futur dal vitg.

Cun ils 50 milliuns francs dumandads cun il credit d'impegn pon vegnir cuvrids 90 pertschient dals custs totals per questa dischlocaziun parziala preventiva da Brinzauls. Il Cussegl grond vegn previsiblamain a tractar durant la sessiun da december 2025 la dumonda da conceder il credit d'impegn.

Fotografia agiuntada:

Agiunta:

Missiva

Infurmaziuns:

• Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 01 (cuntanschibla da las 12.30 fin las 13.45), e‑mail Carmelia.Maissen@diem.gr.ch
• Urban Maissen, selvicultur chantunal, Uffizi da guaud e privels da la natira, tel. +41 81 257 38 51 (cuntanschibel da las 11.30 fin las 12.30), e‑mail Urban.Maissen@awn.gr.ch

Responsabladad: Regenza