Suenter che la premiera è reussida cun success quest onn, publitgescha il Departament d'educaziun, cultura e protecziun da l'ambient (DECA) ussa per la segunda giada la distincziun per lavurs da matura che tematiseschan la plurilinguitad grischuna. Cun questa concurrenza vegnan promovids giuvenils che s'occupan scientificamain da las linguas chantunalas dal Grischun e che prestan uschia ina contribuziun per mantegnair e per appreziar la diversitad linguistica.

Sco gia tar l'emprima premiaziun vegnan undradas maximalmain trais lavurs da matura cun in premi da 200 fin 1000 francs. Participar pon scolaras e scolars che frequentan in gimnasi en il chantun Grischun. Las lavurs da matura ston esser scrittas en ina da las linguas uffizialas grischunas: tudestg, talian, rumantsch (idiom u rumantsch grischun). Er lavurs che s'occupan dals dialects dal chantun èn permessas. La part en scrit da la lavur sto esser vegnida valitada da la scola almain cun la nota 5,0. Las victuras ed ils victurs da la concurrenza sa decleran pronts da preschentar publicamain lur lavur en cas da basegn. Las lavurs pon vegnir inoltradas fin ils 13 da mars 2026 al Post spezialisà per la plurilinguitad. Las lavurs vegnan valitadas d'ina giuria spezialisada tenor criteris sco independenza, originalitad, relevanza sco er correctadad formala e dal rom.

Alberto Palaia, il delegà dal Post spezialisà per la plurilinguitad, accentuescha: «Il Grischun è in chantun cun ina diversitad linguistica singulara – cun tudestg, talian, rumantsch e ses idioms, e cun ulteriurs dialects. Cun la concurrenza vulain nus promover la conscienza per la plurilinguitad e per l'impurtanza da mantegnair questas linguas. Las scolaras ed ils scolars s'occupan intensivamain da las tradiziuns e da las sfidas linguisticas dal chantun. Quai augmenta la stima per nossa diversitad.»

Rinforz da l'identitad linguistica e culturala
La concurrenza è ina da las mesiras dal rapport «Mesiras per mantegnair e per promover la lingua e la cultura rumantscha e taliana en il chantun Grischun» da l'Uffizi federal da cultura e dal Center per democrazia. Las propostas ch'èn vegnidas elavuradas en il rapport cuntegnan var 80 mesiras entaifer ed ordaifer il chantun. Ellas èn divididas en differents champs d'acziun e furman ina basa impurtanta per la lavur dal Post spezialisà per la plurilinguitad dal Grischun.

Agiuntas:

Brev accumpagnanta

Reglament

Infurmaziuns:

Alberto Palaia, delegà dal Post spezialisà per la plurilinguitad, tel. +41 81 257 44 65 (cuntanschibel da las 08.00 fin las 17.00), e‑mail Alberto.Palaia@ekud.gr.ch

Responsabladad: Departament d'educaziun, cultura e protecziun da l'ambient / Post spezialisà per la plurilinguitad