A Milaun è la Regenza grischuna vegnida beneventada oz dal president da la regiun Lumbardia. En il center da l'inscunter èn stads differents temas transcunfinals sco er il rinforzament dal dialog instituziunal tranter il Grischun e la Lumbardia.

En il Palazzo Lombardia a Milaun (Italia) è la Regenza grischuna vegnida retschavida dal president da la regiun Lumbardia Attilio Fontana e dal commember da la Regenza Massimo Sertori, minister per autoritads localas, muntognas, resursas d'energia e d'aua.

L'inscunter ha purschì l'occasiun per approfundar differents temas transcunfinals tranter la Lumbardia ed il Grischun, en spezial differentas dumondas en connex cun la realisaziun dals Gieus olimpics d'enviern 2026 e cun il volumen da traffic respectiv sco er cun la tematica pertutgant las cunfinarias ed ils cunfinaris. Medemamain èn las participantas ed ils participants s'infurmads davart il stadi da realisaziun dals projects d'Interreg Italia–Svizra sco er davart las pussaivladads d'intensivar sin differents plauns il dialog instituziunal tranter il Grischun e la Lumbardia. Quest ultim aspect exprima er il punct central da svilup en il program da la Regenza 2025-2028, che ha la finamira da promover e da rinforzar la cooperaziun transcunfinala.

La visita da la Regenza grischuna en la Lumbardia accentuescha la collavuraziun impurtanta sco er la stretga colliaziun tranter il chantun e la regiun. Il rinforzament dal dialog instituziunal e l'approfundaziun da la collavuraziun transcunfinala èn stads en il center da questa visita ed han confermà las relaziuns existentas tranter ils dus vischins.

Fotografia agiuntada:

Las delegaziuns dal Grischun e da la Lumbardia a l'inscunter a Milaun.

Infurmaziuns:

President da la Regenza Marcus Caduff, schef dal Departament d'economia publica e fatgs socials, e‑mail Marcus.Caduff@dvs.gr.ch

Responsabladad: Regenza