Per la renovaziun da la via da Malögia en ils secturs Silvaplauna e Segl sco er Segl e Plaun da Lej vegn introducì il proxima pass da procedura. Ils 20 d'october 2025 cumenza l'exposiziun publica da cooperaziun per adattar il Plan directiv.

Per ils territoris da cunfin da l'Italia è la via da Malögia la ruta d'access la pli impurtanta en l'Engiadin'Ota ed ella è l'unica colliaziun en la Val Bregaglia. Areguard la segirezza dal traffic ed areguard il standard da construcziun na correspunda questa axa da traffic ch'è economicamain impurtanta betg pli a las pretensiuns actualas. Cunzunt tranter Silvaplauna e Segl è la via stretga e resultan savens accidents, entant ch'il traject Segl Föglias e Plaun da Lej sto regularmain vegnir serrà, pervia da crudadas da crappa e pervia dal privel da lavinas. Ultra da quai mancan vials da velo segirs sin tuts dus trajects.

Dapi decennis han ins l'intenziun d'eliminar quests dus puncts debels tranter Silvaplauna e Malögia. Ils ultims onns èn vegnidas examinadas e sviluppadas vinavant intensivamain eventualas variantas da renovaziun. Ils concepts da renovaziun ch'il chantun ha ussa persequità vinavant, èn il resultat d'ina evaluaziun da las differentas variantas.

Adattaziun en il Plan directiv è necessaria
Projects da vias pli gronds valan tenor la Lescha federala davart la planisaziun dal territori sco projects cun consequenzas considerablas per il territori e per l'ambient e ston perquai vegnir determinads en il Plan directiv chantunal.

Per il traject da via tranter Silvaplauna e Segl prevesa il concept da renovaziun in trassé avert cun da la vart da la muntogna in schlargiament tenor las normas da la via ed er cun in vial da velos. Per il traject tranter Segl Föglias e Plaun da Lej èsi previs da construir in tunnel d'ina lunghezza da 2,7 kilometers, per guntgir la gronda part dals laviners. Tras questa guntgida po vegnir redimensiunà il trassé da la via da Malögia actuala tranter Segl Baselgia e Plaun da Crot. En il futur po quest trassé vegnir duvrà sco via da velos e senda da peduns. Grazia al project da renovaziun previs pon ins meglierar essenzialmain la segirezza per tut las persunas participadas al traffic sco er la protecziun cunter privels da la natira.

Cun la planisaziun directiva vegn il trassé segirà territorialmain, e quai en moda lianta per las autoritads, e vegnan accordads ils interess da la Confederaziun e dal chantun. Ultra da quai vegnan fixadas ulteriuras mesiras per las planisaziuns successivas, che gidan tranter auter a pussibilitar ina concepziun optimala ed ina integraziun en la cuntrada dal project.

Exposiziun publica durant 30 dis
L'adattaziun dal Plan directiv vegn exponida publicamain durant 30 dis, e quai a partir dals 20 d'october 2025. Durant quest temp han tut las persunas interessadas la pussaivladad d'inoltrar en scrit objecziuns e propostas.

Il project sa chatta gia en l'examinaziun preliminara tar la Confederaziun. Sin basa dals resultats da l'exposiziun publica e da l'examinaziun preliminara da la Confederaziun vegn il Plan directiv alura elavurà vinavant. Il Plan directiv vegn concludì da la Regenza grischuna ed approvà dal Cussegl federal.

Fotografias agiuntadas:

Illustraziun 1: Tunnel tranter Segl Föglias e Plaun da Lej

Infurmaziuns:

• Richard Atzmüller, manader da l'Uffizi per il svilup dal territori, tel. +41 81 257 23 21 (cuntanschibel da las 13.30 fin las 14.30), e‑mail Richard.Atzmueller@are.gr.ch
• Rino Camenisch, planisader regiunal, Uffizi per il svilup dal territori, tel. +41 81 257 29 04 (cuntanschibel da las 13.30 fin las 14.30), e‑mail Rino.Camenisch@are.gr.ch

Responsabladad: Uffizi per il svilup dal territori