Dals 6 fin ils 22 da favrer 2026 han lieu ils 25. Gieus olimpics d'enviern a Milaun-Cortina (Italia). Las fullas da visitadras e visitaders, che vegnan spetgadas e che vegnan er a prender la via tras il Grischun per sa render als lieus da concurrenza a Livigno ed a Bormio, chaschunan tschertas sfidas per il chantun areguard la planisaziun dal traffic. La Regenza ha ussa approvà in concept da regulaziun dal traffic, ch'è vegnì elavurà d'ina gruppa da lavur chantunala.

Ina part da las concurrenzas ha lieu a Livigno ed a Bormio, betg lunsch davent dal Grischun. Per il chantun Grischun signifitga en spezial il traffic per Livigno ina sfida. Durant ils dis ils pli frequentads vegnan spetgads fin 12 000 visitadras e visitaders a Livigno. Circa in terz da questas persunas dastgass prender vias tras la Svizra per arrivar a la destinaziun. Ensemen cun ina represchentanza da l'Italia ha ina gruppa da lavur chantunala cun represchentantas e represchentants da l'Uffizi da construcziun bassa, da la Polizia chantunala e da l'Uffizi d'energia e da traffic lavurà ils ultims mais intensivamain vi d'in concept da traffic correspundent. Igl è fitg impurtant ch'i vegnian prendidas mesiras da regulaziun dal traffic, perquai ch'ils gieus olimpics han lieu durant la stagiun auta turistica. Tant la populaziun locala sco er l'economia grischuna han in interess ch'il traffic circuleschia.

Ils puncts principals dal concept
Ina gronda part da las aspectaturas e dals aspectaturs da l'Europa dal Nord e da l'Ost vegn a sa render a Livigno sur il pass dal Fuorn e tras il tunnel Munt la Schera. Gia sut cundiziuns da traffic normalas datti svelt colonnas davant quest tunnel privat d'in vial.

La finamira dal concept è da procurar, che las visitadras ed ils visitaders midian uschè baud sco pussaivel sin il traffic public. Per transportar svelt uschè bleras persunas sco pussaivel tras il tunnel Munt la Schera vegnan en funcziun bus pendulars. Viadis privats tras il tunnel èn pussaivels mo durant tschertas uras per in circul da persunas restrenschì.

Bus pendulars cun park+ride (P+R)

• Ils bus pendulars vegnan a circular cun in tact fitg spess tras il tunnel Munt la Schera – durant las uras las pli frequentadas mintga 3,5 minutas. Uschia resulta ina capacitad da var 17 bus per ura.
• Ils bus pendulars circuleschan vers Livigno davent da las staziuns da Zernez resp. da Mals (Italia) e davent da las plazzas da P+R a Zernez ed en la Val Müstair.
• Perquai ch'il transport d'autos tras il Veraina vegn gia utilisà fitg bain durant il temp da vacanzas, vegn examinada ina plazza da P+R supplementara a Landquart.

Extensiun da la purschida existenta dal traffic public

• Tras in'extensiun da las uras da manaschi e cun agid da colliaziuns supplementaras vegn la Viafier retica ad augmentar l'attractivitad da sias colliaziuns cun l'Engiadina.
• Per returnar giu la Bassa èn previs trens supplementars cunzunt la saira.
• Er las uras da manaschi da la lingia da bus 90.811 Zernez – Mals vegnan extendidas per meglierar la cuntanschibladad la damaun e la saira.

Ulteriur proceder e finanziaziun
Cun l'approvaziun dal concept da traffic vegn la gruppa da lavur chantunala ad elavurar ils detagls ed ad instradar ils pass da realisaziun. Quai èn tranter auter l'elavuraziun e la surdada dals contracts respectivs sco er las preparaziuns architectonicas per ils stabiliments da park+ride. Per las vischnancas pertutgadas e per ils circuls interessads dal Partenz, da l'Engiadina e da las vals dal sid vegn ultra da quai organisada il december a Zernez in'occurrenza d'infurmaziun publica, nua ch'i vegnan preschentads ils detagls.

Ils custs per la gestiun dal traffic e per il dispositiv da segirezza importan previsiblamain circa 5,5 milliuns francs. Da quai èn circa 4,6 milliuns francs custs externs. Tenor las enconuschientschas actualas cumpiglian quests custs la varianta maximala. En connex cun la finanziaziun ha l'Italia empermess ina contribuziun. Sche quella na cuvra betg ils custs, vegnan ils giasts a stuair surpigliar ils custs restants. Lura vegnissan incassadas taxas per utilisar il P+R ed il servetsch da bus pendulars.

Infurmaziuns

Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 05 (cuntanschibla tranter las 14.30 e las 15.30), e‑mail Carmelia.Maissen@diem.gr.ch

Responsabladad: Regenza