Senza l'engaschament da las persunas che assistan lur confamigliars fiss il sistem da sanadad e social en Svizra fermamain engrevgià. Ellas sustegnan regularmain lur proxims, sch'els èn malsauns, han impediments u èn vegls, e quai per il solit gratuitamain e – persunas che assistan lur confamigliars restan savens invisiblas.

La situaziun da las persunas che assistan lur confamigliars n'è savens betg visibla. Bleras dad ellas cumbineschan l'assistenza cun lur professiun e cun la famiglia ed han uschia da dumagnar sfidas temporalas, organisatoricas ed emoziunalas. Er persunas giuvnas surpiglian responsabladad per fragliuns u geniturs. La societad na vesa strusch questas prestaziuns ed igl è difficil da sustegnair las persunas che assistan lur confamigliars. «Gia in pitschen segn da stima gida ed encuraschescha las persunas pertutgadas», di il cusseglier guvernativ Peter Peyer, schef dal Departament da giustia, segirezza e sanadad. «Igl è impurtant da metter pli fitg en il center l'engaschament da questas persunas.»

Ils 30 d'october 2025 organiseschan diesch chantuns gia per la 12avla giada il «Di dals confamigliars che gidan». Quest di dat l'occasiun da promover la conscienza per la rolla da questas persunas e da demussar stima envers ellas. L'allianza interchantunala (Vad, Genevra, Friburg, Neuchâtel, Vallais, Giura, Tessin, Berna, Grischun, Basilea-Citad) suttastritga cun quest di sia renconuschientscha per las persunas che assistan lur confamigliars ed envida la populaziun da render visibla la lavur e da porscher sustegn.

Dar in segn da stima
Il chantun Grischun (l'Uffizi da sanadad) e numerusas organisaziuns chantunalas dal sectur da sanadad e social s'engaschan per che persunas che assistan lur confamigliars survegnian dapli sustegn. Quai cun purschidas d'infurmaziun, servetschs da distgargia, cussegliaziuns e projects davart la cumpatibilitad da la professiun e da l'assistenza. A chaschun dal Di dals confamigliars che gidan han lieu differentas acziuns en il Grischun..

En il center da vegliadetgna Du Lac a San Murezzan vegn averta l'exposiziun «Zuhause sterben». Organisaziuns sco la Crusch Cotschna Svizra, Alzheimer, Pro Senectute e Palliativ èn preschentas al lieu cun stans d'infurmaziun per la populaziun. Al di d'acziun survegnan las persunas che assistan lur confamigliars in engraziament che vegn surdà ad ellas d'organisaziuns chantunalas.

Engaschament cuminaivel per structuras persistentas
Dapi l'onn 2013 s'engaschan ils chantuns participads per che la politica e la societad resguardian pli fitg l'assistenza da confamigliars. Ensemen cun l'organisaziun da tetg naziunala «Cuminanza d'interess Confamigliars che gidan» vegn plinavant lavurà sin plaun federal per meglierar las cundiziuns generalas e per stgaffir structuras persistentas. La finamira è quella da rinforzar a lunga vista l'assistenza da confamigliars e da garantir sia funcziun impurtanta.

Sin www.betreuende-angehoerige-tag.ch chattais Vus ideas, co che Vus pudais demussar sustegn en Voss conturns persunals. Saja quai cun pitschens segns da stima u cun distgargias concretas en il mintgadi.

Infurmaziuns:

Denise Rudin, manadra da partiziun dal Post spezialisà per la promoziun da la sanadad, tel. +41 81 257 64 00, e‑mail Denise.Rudin@san.gr.ch

Responsabladad: Uffizi da sanadad