La Regenza ha approvà il project «Sanaziun ed edifizi nov Lavuratori forestal Valsot» da la vischnanca da Valsot.

Cun la fusiun da las vischnancas da Ramosch e Tschlin l'onn 2013 èn il manaschi forestal e l'uffizi communal vegnids separads ed organisads da nov. Il lavuratori forestal existent a Sclamischot, ch'era vegnì construì il cumenzament dals onns 1990 tras l'anteriura vischnanca da Tschlin per ses basegns, n'ha però betg pli avunda plaz per deponer tut ils vehichels e tut las maschinas da l'uffizi forestal. Sco garaschas supplementaras vegnan actualmain utilisads dus lieus externs. A vista mesauna vegnan quests lieus però a crudar davent. Differentas maschinas forestalas ed apparats vegnan ultra da quai exposts a l'aura. Cunzunt durant l'enviern è quai problematic. Pervia da questa situaziun inadequata vul la vischnanca da Valsot engrondir il lavuratori a Sclamischot e centralisar il parc da maschinas ed uschia meglierar ils andaments dal manaschi.

Per in nov lavuratori forestal èn vegnids examinads trais differents lieus. Questa evaluaziun ha mussà, ch'il lieu che sa chatta 400 meters a l'ost dal lavuratori existent è la meglra soluziun. Il lieu sa chatta en il guaud ed ha in bun access cun ina via. Cun la construcziun d'ina nova halla da lavuratori e cun la sanaziun dal lavuratori existent pon vegnir schliads ils problems da plaz actuals e meglierads considerablamain ils andaments dal manaschi forestal e communal da la vischnanca da Valsot.

Ils custs per construir il lavuratori forestal vegnan calculads cun 675 000 francs. La Regenza ha garantì a la vischnanca da Valsot ina contribuziun chantunala da maximalmain 472 500 francs per realisar il project.

Infurmaziuns: Departament d'infrastructura, energia e mobilitad