La Regenza ha prendì posiziun davart il pachet da contracts da la Confederaziun per sviluppar vinavant la via bilaterala cun l'Uniun europeica. En quest connex vegn ella a la conclusiun, ch'ils avantatgs dal pachet predomineschian cleramain. Resalvas exprima la Regenza en connex cun la realisaziun da la cunvegna previsa davart l'energia electrica.
La Regenza ha prendì posiziun davart il project da consultaziun dal Departament federal d'affars exteriurs (DFAE) en connex cun il pachet «Stabilisar e sviluppar vinavant las relaziuns Svizra–UE». Il pachet da contracts ch'il Cussegl federal ha elavurà, duai stabilisar la via bilaterala cumprovada e garantir a lunga vista ch'ils contracts bilaterals existents funcziunian.
Ils avantatgs dal pachet da contracts cun la UE predomineschan
La Regenza grischuna è da l'avis, ch'i saja en l'interess dal chantun da reglar las relaziuns politicas ed economicas cun l'Uniun europeica (UE). Il pachet da contracts ch'è vegnì negozià cun la UE, è tenor ella ina basa solida ed equilibrada per stabilisar e per sviluppar vinavant la via bilaterala. Las schanzas respectivamain ils avantatgs dal pachet da contracts predomineschan ord vista da la Regenza. Cun il pachet da contracts vegn d'ina vart garantì er en l'avegnir l'access al martgà intern da la UE sco er la participaziun als programs da la UE (furmaziun, perscrutaziun, innovaziun). Da l'autra vart rinforzan ils contracts la collavuraziun instituziunala cun la UE. En conturns internaziunals pli e pli malsegirs èsi d'impurtanza centrala, che las relaziuns cun la UE sco pli impurtanta partenaria commerziala da la Svizra sajan stabilas e regladas cleramain.
La Regenza è conscienta, ch'il pachet da contracts porta er ristgas respectivamain dischavantatgs. Ord vista dals chantuns stoi vegnir dà spezialmain attenziun a la chargia administrativa supplementara previsibla (custs da las consequenzas da la regulaziun) sco er al privel smanatschant d'indossar las grevezzas da la Confederaziun als chantuns. En il rom da la realisaziun dals contracts èsi perquai da guardar consequentamain che la chargia finanziala e persunala supplementara per ils chantuns restia minimala.
Resalvas concernent la realisaziun da la cunvegna davart l'energia electrica
Resalvas exprima la Regenza en connex cun la cunvegna previsa davart l'energia electrica. Ella fa attent, che la realisaziun da la cunvegna davart l'energia electrica chaschuna sfidas considerablas sin plaun naziunal. Particularmain stoi vegnir garantì, che la suveranitad chantunala en il sectur da la forza idraulica na vegnia betg tangada. Er na dastga la surpigliada dinamica dal dretg betg avair consequenzas per las surdadas da concessiuns, ils tschains d'aua u il return d'implants.
Per il referendum facultativ
La Regenza è da l'avis, ch'igl è correct da suttametter quests contracts internaziunals al referendum facultativ. Sch'i dovra ina maioritad dals chantuns u betg, resulta da la Constituziun federala ch'il pievel ed ils chantuns han approvà. Quai na dastga betg esser ina decisiun politica. Sch'il Cussegl federal e l'Assamblea federala pon fixar en il cas singul, tge furma da referendum che vala, resulta in cas da precedenza problematic ord vista dal dretg constituziunal. La Regenza sa basa sin duas decisiuns: L'onn 2012 han 75 pertschient da las votantas e dals votants e 23 chantuns refusà cleramain l'iniziativa dal pievel «Per rinforzar ils dretgs dal pievel en la politica exteriura (Il pievel duai decider davart contracts internaziunals!)». Er en il chantun Grischun è l'iniziativa vegnida refusada cun 75 pertschient. L'onn 2021 n'è il parlament federal plinavant betg entrà en l'intervenziun «Referendum obligatoric per contracts internaziunals da caracter constituziunal».
Consultaziuns dal Departament federal d'affars exteriurs
Infurmaziuns: Departament d'economia publica e fatgs socials