L'Uffizi da construcziun bassa ha terminà la concurrenza da projects per la nova punt da Cimavilla a Poschiavo. Il project victur «Palimpsest» persvada cun ses tractament respectus dals elements existents e cun sia concepziun moderada e funcziunala. El meglierescha la situaziun actuala en ina moda simpla, ma precisa e contribuescha uschia essenzialmain a proteger il maletg dal lieu ch'è degn da vegnir protegì.

A l'entrada nord dal vitg traversa la via dal Bernina il Poschiavino sur la Ponte Cimavilla. L'onn 1987 han in'aua gronda ed ina bova destruì la punt oriunda. Suenter las malauras han ins stuì chattar svelt ina soluziun. Uschia è la punt actuala vegnida construida al medem lieu sco remplazzament provisoric. La punt actuala è vegnida construida pli aut che la punt veglia, uschia che las rampas d'access èn pli stippas. Spezialmain da la vart ost è uschia vegnida midada la situaziun oriunda che sumegliava ad ina plazza. Da la vart nord da la punt ston las pedunas ed ils peduns chaminar sin la via. I na dat naginas vias separadas per il traffic betg motorisà. Questa situaziun duai ussa vegnir meglierada.
Per chattar ina soluziun d'auta qualitad ch'è cumpatibla cun il lieu, ha l'Uffizi da construcziun bassa organisà ina concurrenza da projects. La concurrenza è vegnida publitgada il november 2024. Fin al termin d'inoltraziun il zercladur 2025 èn vegnidas inoltradas tut en tut set contribuziuns. Ina giuria dad otg persunas ha valità ils projects tenor differents criteris professiunals e concepziunals.

Il project victur «Palimpsest» persvada cun sia discreziun e ses tractament conscienzius dals elements existents
Il project victur «Palimpsest» meglierescha ils elements existents – cun intervenziuns precisas en ina moda quasi evidenta. «La discreziun serva a mantegnair il maletg dal lieu protegì. Quai è ina gronda qualitad dal project», lauda Matthias Wielatt, schef da la partiziun Construcziuns artifizialas da l'Uffizi da construcziun bassa e commember dal gremi da giudicament.
«Palimpsest» mantegna l'effectiv, uschia che la realisaziun daventa favuraivla e simpla. Il stadi actual vegn meglierà tras intervenziuns bain ponderadas e discretas. Il spazi verd existent vegn mantegnì, en spezial en il sectur da la fermada da bus previsa. Cun excepziun dals mirs da balustrada renunzia il project ad elements concepziunals per lung dal Poschiavino. Uschia resta il spazi dal flum accessibel e perceptibel.
La fermada da bus vegn realisada sco fermada sin la via. Cun la strivla melna che sa chatta tranteren è ella concepida bain ed en moda segira. L'anteriura nischa da fermada dal bus duai vegnir duvrada sco plazza da parcar. Questa soluziun correspunda da princip a la finamira da mantegnair la substanza existenta.
Davos «Palimpsest» stat il biro d'inschigneria turitgais Bergmeister + Partner SA che ha elavurà il project en collavuraziun cun KOLLEKTIV NORDOST da Son Gagl (architectura da cuntradas) e cun D'Inca Imboden Architekten da Cuira.

Ulteriur proceder ed exposiziun
Il project victur vegn ussa elavurà vinavant. El vegn previsiblamain exponì publicamain la fin da l'onn 2026. Il termin da la realisaziun dependa dals resuns en la procedura d'approvaziun.

«Palimpsest» vegn exponì en la Casa Torr a Poschiavo. Las uras d'avertura per visitar libramain l'exposiziun èn dals 12. fin ils 15.11.2025 da las 08.00 fin las 12.00 e da las 13.30 fin las 17.00, sco er ils 17.11.2025 da las 08.00 fin las 12.00.

Fotografia agiuntada:

1. Visualisaziun © Rachel Hess

2. Model © Modellbau Morf

3. Plan da survista © Bergmeister + Partner AG, KOLLEKTIV NORDOST, D'Inca Imboden Architekten

Agiuntas:

Rapport da la giuria

Infurmaziuns:

• Reto Knuchel, inschigner chantunal, Uffizi da construcziun bassa, tel. +41 81 257 37 01 (cuntanschibel da las 11.00 fin las 12.00), e‑mail Reto.Knuchel@tba.gr.ch
• Matthias Wielatt, schef Construcziuns artifizialas, Uffizi da construcziun bassa, tel. +41 81 257 37 77 (cuntanschibel da las 10.00 fin las 12.00), e‑mail Matthias.Wielatt@tba.gr.ch

Responsabladad: Uffizi da construcziun bassa

Infobox: Significaziun dal num «Palimpsest»

La noziun «palimpsest» deriva oriundamain da l'antica e designava in toc pergiamina u palpiri, dal qual il text oriund vegniva sgarà u lavà giu, per pudair scriver danovamain sin la surfatscha. Oz vegn l'expressiun duvrada en il senn figurativ: In palimpsest stat per insatge che cumpiglia fastizs da differents temps, nua che las stresas da pli baud restan anc visiblas u perceptiblas cun las midadas da pli tard.