Per la 18avla giada ha il chantun Grischun publitgà ina concurrenza per promover la lavur culturala professiunala per projects pitschens. Da las tut en tut 23 dumondas èn tschintg projects vegnids undrads cun quatter contribuziuns ad ovras e cun in stipendi liber. La summa totala importa 50 000 francs.
Cun ils daners da sustegn da la concurrenza survegnan artistas ed artists la pussaivladad da lavurar vi d'ina ovra creativa, e quai senza squitsch finanzial e professiunal. La finamira è quella da pussibilitar il svilup tematic da projects culturals. Il dretg da sa participar a la concurrenza han artistas ed artists professiunals che han lur domicil dapi almain 2 onns en il chantun Grischun u ch'èn colliads stretgamain cun il chantun Grischun u cun la cultura grischuna. La Cumissiun da concurrenza ha giuditgà 23 dumondas ord las spartas da l'art applitgà e da l'art figurativ, da l'istorgia e memoria, da la litteratura, da la musica, dal saut e dal teater.
Il schef dal Departament d'educaziun, cultura e protecziun da l'ambient, cusseglier guvernativ dr. Jon Domenic Parolini, ha decidì – sin proposta da la Cumissiun da concurrenza e da l'Uffizi da cultura – davart la surdada da las contribuziuns ad ovras.
Las suandantas tschintg artistas ed artists survegnan ina contribuziun u in stipendi liber da mintgamai 10 000 francs per lur ovra:
- Num: Robert Grossmann, Seglias
Naschì ils: 30 da december 1953
Sparta: Musica
Project: «Der Stadtbrand von Chur»
- Num: Stefan Kägi, Winterthur
Naschì ils: 18 da matg 1990
Sparta: Musica
Project: «Undersized empire – eine Klanginstallation»
- Num: Ella Moana Bürkli, Cuira
Naschida ils: 17 da november 2006
Sparta: Saut
Project: «Break the Borders – Cultures in Motion» (stipendi liber)
- Num: Sandro Livio Straube, Vella
Naschì ils: 17 d'avust 1992
Sparta: Art figurativ
Project: «Der Traum des Hotel Tarasp»
- Num: Jan-Andrea Bernhard, Strada/Glion
Naschì ils: 4 da matg 1971
Sparta: Istorgia e memoria
Project: «Familiengeschichte (de)Prevost(i) [de Praepositis]»
Dapli infurmaziuns:
Infurmaziuns:
Andrea Conrad, manadra Promoziun da la cultura, tel. +41 81 257 48 07, e‑mail Andrea.Conrad@afk.gr.ch
Responsabladad: Uffizi da cultura / Promoziun da la cultura