Il president da la Regenza Marcus Caduff e la cussegliera guvernativa Carmelia Maissen han preschentà oz glindesdi la «Strategia per il traffic betg motorisà en il Grischun 2037». Cun la strategia vul il chantun promover sistematicamain la mobilitad activa. En il mintgadi ed en il temp liber duai il traffic betg motorisà daventar fin l'onn 2037 ina pitga principala centrala da la mobilitad en il Grischun.
En il Program da la Regenza 2025–2028 ha la Regenza grischuna er mess in accent sin il traffic betg motorisà. Cun la preschentaziun da la «Strategia per il traffic betg motorisà en il Grischun 2037» è quai ussa vegnì concretisà per l'emprima giada. E la visiun da la strategia è definida cleramain: «Fin l'onn 2037 duai il chantun Grischun esser enconuschent er ordaifer ils cunfins chantunals per sias purschidas attractivas en il traffic betg motorisà», di il president da la Regenza Marcus Caduff, schef dal Departament d'economia publica e fatgs socials. Vias, sendas da viandar e vias da velo da muntogna concepidas en moda attractiva duain envidar la populaziun, las persunas occupadas ed ils giasts da sa mover en moda activa. «Uschia garantin nus a lunga vista in'auta qualitad dal lieu e rinforzain noss chantun sco lieu da viver, lieu economic e territori da recreaziun attractiv.»
La cussegliera guvernativa Carmelia Maissen, scheffa dal Departament d'infrastructura, energia e mobilitad, tutga la noda: «Fin l'onn 2037 è il traffic betg motorisà ina pitga principala centrala da la mobilitad en il chantun Grischun, uschia che la mesadad da tut las vias en il chantun vegn fatga a pe u cun il velo.» Tenor la strategia duai la mobilitad activa en il mintgadi ed en il temp liber sa chapir da sezza e vegnir promovida en moda activa.
Trais finamiras per l'entir territori chantunal
La «Strategia per il traffic betg motorisà en il Grischun 2037» è vegnida elavurada ils ultims 2 onns d'ina gruppa da project che cumpiglia plirs departaments e posts da servetsch. Differentas organisaziuns spezialisadas han fatg valair lur interess. Per ch'il traffic betg motorisà daventia ils proxims 12 onns la pitga principala centrala dal Grischun, èn vegnidas definidas en la strategia las suandantas trais finamiras per l'entir territori chantunal:
- Finamira 1: Furmas da mobilitad equivalentas
Il traffic betg motorisà è en il chantun Grischun – ultra dal traffic individual motorisà e dal traffic public – ina furma da mobilitad equivalenta e cun ils medems dretgs.
- Finamira 2: Augment da la cumpart dal traffic betg motorisà
La part dal traffic betg motorisà è s'augmentada cleramain en il chantun Grischun pervia d'ina promoziun sistematica.
- Finamira 3: Cleras cumpetenzas e clers process
Las cumpetenzas ed ils process concernent il traffic betg motorisà èn reglads e coordinads cleramain en il chantun Grischun.
Tschintg champs d'acziun per la realisaziun
Per realisar cun success la «Strategia per il traffic betg motorisà en il Grischun 2037» èn vegnids fixads tschintg champs d'acziun tematics: (guardar il fegl sgulant separà)
Mintgin dals tschintg champs d'acziun cuntegna differentas incumbensas concretas al chantun. En intgins champs d'acziun vegnan ultra da quai fatgas recumandaziuns a las vischnancas ed a las regiuns.
Proxims pass
La realisaziun da la «Strategia per il traffic betg motorisà en il Grischun 2037» vegn ussa promovida pass per pass. Per quest intent nominescha il chantun in'organisaziun da project, per la quala l'Uffizi da construcziun bassa sco Post spezialisà per il traffic betg motorisà surpiglia la responsabladad strategica. In team da project sa deditgescha a l'elavuraziun da las mesiras concretas sco er a la coordinaziun specifica tranter ils uffizis. Ultra da quai nominescha il chantun ina gruppa accumpagnanta cun persunas spezialisadas, represchentantas e represchentants da regiuns e da vischnancas, stakeholders relevants dals uffizis chantunals pertutgads sco er federaziuns spezialisadas ed organisaziuns externas. Questa gruppa vegn infurmada regularmain davart il stadi da realisaziun e tenor basegn integrada.
«La ‹Strategia per il traffic betg motorisà en il Grischun 2037› porscha la schanza da sviluppar vinavant noss chantun en moda progressiva. Nizzegiain questa schanza – midain cuminaivlamain med da transport!», di la cussegliera guvernativa Carmelia Maissen.
Agiuntas:
Auskunftspersonen:
- President da la Regenza Marcus Caduff, schef dal Departament d'economia publica e fatgs socials, e‑mail Marcus.Caduff@dvs.gr.ch
- Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, e‑mail Carmelia.Maissen@diem.gr.ch
Responsabladad: Regenza