La Regenza grischuna ha elegì Michèle Hess sco nova cussegliera da banca per la Banca Chantunala Grischuna. Michèle Hess entra en uffizi il 1. d'avrigl 2026.

Tenor la Lescha davart la Banca Chantunala Grischuna (BCG) è la Regenza cumpetenta per eleger il cussegl da banca che sa cumpona da set persunas. Sco nova commembra ha ella elegì Michèle Hess per la perioda d'uffizi dal 1. d'avrigl 2026 fin ils 31 da mars 2030.

Michèle Hess è vegnida elegida pervia da sias lungas experientschas cumprovadas en il sectur da finanzas e da banca (dretg dal martgà da finanzas, surveglianza da las bancas, ambient regulatoric, compliance e corporate governance). Dapi l'onn 2025 è Michèle Hess executive director da l'interpresa hs-consult a Turitg. Avant ha ella manà durant 11 onns il sectur financial services compliance & regulations advisory tar l'interpresa PricewaterhouseCoopers a Turitg e lavurà durant 8 onns tar l'Autoritad federala per la surveglianza dals martgads da finanzas FINMA (anteriura Cumissiun federala da bancas CFB). Plinavant è ella presidenta resp. commembra dal cussegl d'administraziun da dus ulteriurs instituts dal sectur da finanzas. Michèle Hess ha studegià giurisprudenza a l'Universitad da Son Gagl (HSG) ed è advocata. Ella ha absolvì differentas furmaziuns supplementaras en ils secturs leadership, temas regulatorics e novas tecnologias.

Il cussegl da banca sto vegnir renovà cuntinuadamain. En quest connex vegnan mintgamai resguardadas las prescripziuns da la FINMA, las prescripziuns chantunalas da corporate governance sco er il profil da pretensiuns che la Regenza ha definì envers ils commembers dal cussegl da banca. La BCG ha dumandà la FINMA d'approvar l'elecziun tenor il dretg da surveglianza.

Michèle Hess suonda Ines Pöschel che vegn a sortir dal cussegl da banca la fin da mars 2026, cura che sia segunda perioda d'uffizi va a fin. Suenter in engaschi activ dad 8 onns ha ella decidì da betg star a disposiziun per ina terza perioda d'uffizi da 4 onns. La Regenza engrazia gia ussa ad ella per sia activitad preziusa e prosperaivla durant blers onns sco commembra dal cussegl da banca da la Banca Chantunala Grischuna.

Fotografia agiuntada:

Michèle Hess © hs-consult scrl

Infurmaziuns:

Cusseglier guvernativ Martin Bühler, schef dal Departament da finanzas e vischnancas, tel. +41 81 257 32 05 (cuntanschibel da las 11.00 fin las 12.30), e‑mail Martin.Buehler@dfg.gr.ch

Responsabladad: Regenza