Cun la midada da l'urari dals 14 da december 2025 vegn meglierada la purschida dal traffic public en il Grischun ed augmentada la capacitad da transport en il chantun. Uschia porschan las Viafiers federalas a partir da mez december mintga di il tact da mes'ura senza interrupziuns cun trens-intercity svelts tranter Turitg e Cuira. Er la Viafier retica cursescha en il tact da mes'ura sin il traject da Cuira a Glion, ed en Surselva vegn introducì in nov concept da bus.
Cun la midada da l'urari survegnan la populaziun ed ils giasts dal chantun Grischun pli frequentas pussaivladads da viagiar e fitg bunas colliaziuns. Ultra dal tact da mes'ura senza interrupziuns da Cuira a Turitg sco er da Cuira a Glion profiteschan er las regiuns turisticas da Lai e da l'Engiadina Bassa d'optimaziuns dal tact. Plinavant èn previsas er colliaziuns supplementaras tranter Cuira e Bellinzona.
Tact da mes'ura Cuira – Turitg ed en Surselva
A partir dals 14 da december 2025 porschan las Viafiers federalas da nov mintga di da las 06.00 fin las 19.30 in tact da mes'ura senza interrupziuns tranter Turitg e Cuira. Er en il tact da mes'ura cursescha la Viafier retica sin il traject Cuira – Glion. Il tact da mes'ura tranter Cuira e Glion vegn introducì en in emprim pass a maun d'in concept transitoric, che resguarda ina politica da fermada alternanta en la Ruinaulta. Il motiv per quest concept transitoric èn differents plazzals sin il traject da la Viafier retica tranter Cuira e Glion.
A Tscheppa tar Bugnei (sper Sedrun) vegn mess en funcziun in nov lieu da cruschada da la Viafier Matterhorn-Gottard (VMG), quai che procura per viadis pli curts tranter Mustér ed Andermatt. Ultra da quai èn las colliaziuns a Mustér accordadas optimalmain cun l'urari da la Viafier retica.
Nov concept da bus en Surselva
En Surselva vegn introducì in nov concept da bus. Sin tut las lingias da bus survegnan las passagieras ed ils passagiers qua tras pli frequentas pussaivladads da viagiar e meglras colliaziuns. Er tranter Glion e Dieni vegn il tact da mes'ura realisà durant ina fasa transitorica cun ina colliaziun da bus supplementara. Uschia profiteschan la populaziun ed ils giasts da la part sura da la Surselva dal tact da mes'ura. Supplementarmain vegn cumplettada la purschida da la saira e da la fin d'emna. Ils viadis cun obligaziun da reservar pon ins da nov cumprar en moda confortabla sur la app SBB Mobile ubain sur ils uraris online.
Sistematisaziun da la viafier S da Cuira
Las novas purschidas da la Viafier retica pretendan ina sistematisaziun da la viafier S da Cuira. Ils temps da partenza vegnan adattads en tscherts puncts. Qua tras crodan las fermadas a Haldenstein per gronda part davent. Durant las uras da grond traffic survegn Haldenstein dapli colliaziuns da bus.
Optimaziuns dal tact en las regiuns turisticas
Perquai che la dumonda en il traffic da temp liber è s'augmentada fermamain, vegni correspundentamain a dar dapli colliaziuns durant la stagiun principala. Las regiuns turisticas da Lai e da l'Engiadina Bassa profiteschan d'ina optimaziun dal tact, ed er Arosa survegn durant la fin d'emna dapli colliaziuns da la Viafier retica.
Durant las uras marginalas survegnan las regiuns dal chantun Grischun uschia anc meglras colliaziuns cun il traffic a gronda distanza. Per exempel curseschan uschia la damaun e la saira dapli autos da posta tranter Cuira e Flem/Laax.
Novas colliaziuns vers sid
En il corridor per l'Italia planiseschan las VFF davent da Bellinzona pass per pass ina cumplettaziun pli gronda da la purschida. En tscherts puncts vegnan perquai purschidas colliaziuns supplementaras dal bus express Cuira – Bellinzona. Medemamain vegn augmentà il dumber da bus express tranter Poschiavo e Samedan e pia engrondida la capacitad sin quest corridor.
Adattaziuns en l'urari dal Bus da Cuira a partir da la midada da l'urari
En il rom da la proxima midada da l'urari fa il Bus da Cuira differentas adattaziuns sin sias lingias, quai per coordinar la purschida en moda optimala cun la dumonda actuala e cun las cundiziuns generalas midadas. Perquai ch'il tren ferma main savens a la staziun da Haldenstein, cursescha la lingia 3 en l'avegnir tranter la fermada Haldenstein, Hanfländer e Cuira, Plazza da la staziun da glindesdi fin venderdi durant las uras da bler traffic da la damaun e da la saira en il tact da 15 minutas. Er sin la lingia 6 tranter Cuira, Plazza da la staziun e City West vegn la purschida engrondida: Da nov curseschan ils bus er la sonda en il tact da 15 minutas, quai per tegnair quint dal traffic da temp liber e da cumpra pli grond.
Innovaziun e purschida da notg
En la regiun da Tavau cursescha gia dapi il zercladur 2025 il bus da notg invia PickMeUP (bus da traffic public sin dumonda), che porta las passagieras ed ils passagiers er la saira tard en lur destinaziun. Il resun sin la nova purschida è stà positiv ed ils bus vegnan utilisads frequentamain.
Il persunal viagiant dad AutoDaPosta na venda pli nagins bigliets
A partir d'immediat pon las passagieras ed ils passagiers cumprar ils bigliets en moda digitala e senza daners contants en tut il Grischun. Suenter ina cumplettaziun durant plirs onns ed en etappas stat il sistem innovativ Venda ussa a disposiziun en tut ils autos da posta ed en bleras staziuns da viafier en il chantun.
Sut www.oev-info.ch pon las novas colliaziuns dal traffic public vegnir consultadas a maun da la tschertga d'urari. Ils novs uraris èn in pass impurtant per promover ulteriuramain il Grischun sco destinaziun attractiva per turistas e turists sco er per las pendularias ed ils pendularis.
Fotografia:
Agiuntas:
Infurmaziuns:
- Cussegliera guvernativa dr. Carmelia Maissen, Departament d'infrastructura, energia e mobilitad, e‑mail Carmelia.Maissen@diem.gr.ch
- Thomas Schmid, manader da l'Uffizi d'energia e da traffic, tel. +41 81 257 36 21 (cuntanschibel da las 11.00 fin las 15.00), e‑mail Thomas.Schmid@aev.gr.ch
Responsabladad: Uffizi d'energia e da traffic