Dals 6 fin ils 22 da favrer 2026 han lieu ils 25. Gieus olimpics d'enviern a Milaun-Cortina (Italia). Ils viadis a las concurrenzas mainan per part tras il chantun Grischun. Per ch'il traffic supplementar circuleschia en moda segira, ordinada e sche pussaivel senza colonnas, ha il chantun Grischun elavurà in concept da traffic e da parcadi cumplessiv. Quest concept è vegnì preschentà oz glindesdi, ils 15 da december 2025, a chaschun d'ina occurrenza d'infurmaziun a Zernez, a represchentantas ed a represchentants da la politica, da las vischnancas, dal turissem, da l'hotellaria e dal sectur da transport.
Ils Gieus olimpics d'enviern 2026 han lieu durant la stagiun auta dal turissem. Il traffic supplementar da visitadras e visitaders resulta pia il medem mument sco il traffic d'enviern normal en l'Engiadina. Durant ils dis dal pli grond traffic dastgassan tranter 3000 e 4000 visitadras e visitaders viagiar sur las vias svizras a las concurrenzas. Per il chantun Grischun è en spezial il lieu da concurrenza Livigno ina sfida areguard il traffic. Ina passascha stretga durant quest temp è il tunnel Munt La Schera. Senza reglar il traffic cun cleras mesiras, stuess ins far quint cun colonnas e restricziuns considerablas per la regiun. Il concept da traffic ha perquai ina clera finamira: Il traffic duai vegnir chanalisà e dirigì, per che la capacitad da las vias en l'Engiadina ed en il Partenz restia tant sco pussaivel mantegnida per las abitantas ed ils abitants, per ils giasts e per la mastergnanza locala.
Viadis da visitadras e visitaders
Cun vehichels privats pon ins viagiar mo fin als lieus da park + ride definids. Da là anora cuntinuescha il viadi per Livigno cun la Viafier retica (da Landquart fin Zernez) sco er cun bus pendulars, che circuleschan sco part integrala da la purschida da traffic public extendida.
Ils suandants lieus da park + ride stattan a disposiziun:
- Landquart:
140 parcadis supplementars sco er las capacitads existentas (1670 parcadis) dal Fashion Outlet tenor las tariffas existentas
- Zernez Nord:
1030 parcadis / 70.– francs per di e vehichel (plus TPV)
- Zernez Sid:
410 parcadis / 70.– francs per di e vehichel (plus TPV)
- Müstair:
630 parcadis / 70.– francs per di e vehichel (plus TPV)
Per arrivar a Zernez cun il traffic public nà dal nord e da l'ost ha la Viafier retica extendì sia purschida cunzunt la damaun e la saira. Las uras da partenza dals bus pendulars èn accordadas cun las uras d'arriv e da partenza da la Viafier retica.
Tut las colliaziuns dals bus pendulars èn integradas en l'urari normal sco colliaziuns regularas dal traffic public. Ellas vegnan publitgads a partir dal schaner 2026 en l'urari online da las Viafiers federalas. Per las colliaziuns valan ils pretschs normals dal traffic public. Tut ils abunaments dal traffic public restan valaivels en il territori respectiv (per exempel abunament da mesa taxa, abunament general u BÜGA).
Mo cun permissiun tras il tunnel Munt La Schera
Durant ils Gieus olimpics d'enviern dastgan mo vehichels cun ina permissiun respectiva charrar tras il tunnel Munt La Schera:
- Vehichels olimpics: Legitimaziun exclusiva («VAPP») per persunas accreditadas, emessa da l'organisaziun Milano-Cortina 2026
- Cunfinarias e cunfinaris sco er pendularias e pendularis: «Pass Tunnel Prioritario», emess da la vischnanca da Livigno
- Giasts dals manaschis d'alloschament a Livigno: «Pass Tunnel Ordinario», emess da l'alloschi respectiv
Tut las ulteriuras visitadras ed ils ulteriurs visitaders pon viagiar a Livigno mo cun il traffic public (bus pendular).
Vignetta da transit per la regiun, la populaziun e la mastergnanza
Per il chantun Grischun èsi d'ina impurtanza centrala, che la mobilitad da las abitantas e dals abitants, dals giasts da la regiun sco er da la mastergnanza locala restia garantida tant sco pussaivel senza restricziuns, malgrà ils Gieus olimpics d'enviern. Per quest intent vegn introducida ina vignetta da transit.
La vignetta da transit facilitescha ils viadis privats sin las vias da l'Engiadina e da la Val Müstair. Quai vul dir, ch'il passadi tar ils posts da controlla è pli simpel. La vignetta na permetta però betg da charrar tras il tunnel Munt La Schera.
La vignetta da transit po vegnir chargiada giu sut www.gr.ch/olympia2026 (fegl A4, PDF).
Custs e finanziaziun
Ils custs totals per las mesiras da traffic e da manaschi en connex cun ils Gieus olimpics d'enviern importan circa 5,5 milliuns francs. Ina part dals custs vegn cuvrida cun ils retgavs dals bigliets da park + ride. Areguard la finanziaziun dals custs restants è la Regenza en tractativas cun l'Italia.
Agiuntas:
Dapli infurmaziuns:
www.gr.ch/olympia2026 (FAQ e download da la vignetta da transit)
Infurmaziun:
Las medias vegnan supplitgadas da drizzar en il futur lur dumondas davart las mesiras per diriger il traffic en connex cun ils Gieus olimpics d'enviern 2026 a la suandanta adressa dad e-mail: olympia2026@gr.ch
Infurmaziuns:
- Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 05 (cuntanschibla da las 14.00 fin las 15.00), e‑mail Carmelia.Maissen@diem.gr.ch
- Marcel John, sectur d'acziun Traffic, Uffizi da construcziun bassa, tel. +41 81 257 37 54 (cuntanschibel da las 14.30 fin las 15.30), e‑mail Marcel.John@tba.gr.ch
- Lukas Studer, sectur d'acziun Traffic public, Uffizi d'energia e da traffic, tel. +41 81 257 36 04 (cuntanschibel da las 14.30 fin las 15.30), e‑mail Lukas.Studer@aev.gr.ch
- Andrea Mittner, sectur d'acziun Polizia, Polizia chantunala dal Grischun, tel. +41 81 257 64 55 (cuntanschibel da las 14.30 fin las 15.30), e‑mail Andrea.Mittner@kapo.gr.ch
Ils trais responsabels per ils secturs d'acziun Traffic, Traffic public e Polizia stattan a disposiziun da las 13.30 fin las 14.30 en l'auditori dal Parc Naziunal Svizzer a Zernez per intervistas.
Responsabladad: Departament d'infrastructura, energia e mobilitad