Karin Mössenlechner, ambassadura dal Reginavel dals Pajais Bass, Patrick Van Geehl, ambassadur dal Reginavel da la Belgia, e Robert Lauer, ambassadur dal Gronducadi da Luxemburg han visità oz – sin invit da la Regenza – il chantun Grischun.
L'ambassadura dals Pajais Bass, Karin Mössenlechner, l'ambassadur da la Belgia, Patrick Van Geehl, e l'ambassadur dal Luxemburg, Robert Lauer, èn vegnids beneventads oz en la Chasa grischa a Cuira dal president da la Regenza Marcus Caduff, dal chancelier Daniel Spadin e da l'incumbensà per relaziuns externas Dominik Hemmi. L'ambassadura Karin Mössenlechner è vegnida accumpagnada dal consul onurari general Koos Vink, l'ambassadur Patrick Van Geehl dal cussegliader diplomatic dr. Michelangelo Temmermann e l'ambassadur Robert Lauer da la cussegliera d'ambassada Laura Lakaff. Suenter il barat dals salids uffizials è in gentar cuminaivel stà sin il program.
La Regenza grischuna tgira annualmain contacts cun represchentantas e represchentants da stadis esters en Svizra. Ils discurs èn elements impurtants da las relaziuns externas dal chantun. Cun ils stadis vischins e cun ils pajais che han relaziuns spezialas cun la Svizra e cun il Grischun vegnan discutadas savens dumondas specificas actualas. Autras visitas servan en emprima lingia a barattar experientschas sin il champ cultural, economic e politic.
Fotografia agiuntada:
da sanestra a dretga: il chancelier Daniel Spadin, l'ambassadur Patrick Van Geehl, il president da la Regenza Marcus Caduff, l'ambassadura Karin Mössenlechner e l'ambassadur Robert Lauer
Infurmaziuns:
President da la Regenza Marcus Caduff, schef dal Departament d'economia publica e fatgs socials, e‑mail Marcus.Caduff@dvs.gr.ch
Responsabladad: Regenza