La Regenza dal chantun Grischun recumonda a las votantas ed als votants da refusar l'iniziativa dal pievel «200 francs bastan! (Iniziativa SSR)». L'iniziativa prevesa da sbassar la taxa da radio e televisiun. Quai indebliss duraivlamain il provediment da medias fidà, la varietad linguistica sco er la participaziun democratica en il Grischun sco chantun da muntogna pluriling.
Il Grischun è caracterisà tras ina gronda diversitad linguistica, culturala e geografica. En quest context surpiglia la SRG SSR ina rolla centrala per segirar la preschientscha mediala da la cuminanza linguistica rumantscha e taliana sco er per proveder las regiuns perifericas e muntagnardas cun infurmaziuns. Cun sbassar las taxas sco previs, vegniss reducida considerablamain la purschida da medias per las minoritads linguisticas. Ils programs rumantschs e talians da la SRG SSR èn indispensabels per render visiblas e per mantegnair questas cuminanzas linguisticas. Senza ina structura cun ina finanziaziun solidarica na fissi betg garantì, ch'els pudessan exister vinavant en la furma actuala.
Il Grischun è pertutgà surproporziunalmain
Pervia da la situaziun geografica, pervia da sia diversitad linguistica e pervia da sias relaziuns structuralas ha il Grischun mo ina capacitad limitada sco martgà da medias. Dal sbassament da las taxas fissan las regiuns perifericas e muntagnardas pertutgadas sur la media, perquai che purschiders da medias privats na pudessan betg serrar en moda economica las largias da provediment che resultan. Ina reducziun da las purschidas da medias en las regiuns avess plinavant consequenzas directas per la furmaziun da l'opiniun democratica. Damain schurnalissem regiunal signifitga damain infurmaziuns davart ils svilups communals e chantunals ed uschia ina restricziun da la participaziun democratica da la populaziun.
La Regenza parta dal fatg, che la producziun da medias vegniss centralisada pli e pli fitg e ch'ils posts regiunals vegnissan serrads, sche l'iniziativa vegniss acceptada. Cun quai giess er a perder la varietad da medias, la qualitad schurnalistica e la francaziun regiunala – per Cuira e per tut il Grischun.
La finala indebliss ina smesada dal preventiv da la SSR la contribuziun da la SRG SSR a favur da la coesiun naziunala. Sco chasa da medias da dretg public promova ella il barat e la chapientscha vicendaivla tranter las regiuns linguisticas e presta uschia ina contribuziun impurtanta a favur da la coesiun da la Svizra.
Infurmaziuns:
Cusseglier guvernativ dr. Jon Domenic Parolini, il schef dal Departament d'educaziun, cultura e protecziun da l'ambient vegn ad explitgar la posiziun da la Regenza oz a las 11.00, a chaschun da l'inscunter cun las medias. Suenter stat el a disposiziun per dumondas individualas.
Responsabladad: Regenza