La Regenza conceda a la Casa Depuoz da stgaffir a Tumein a partir da l'onn da scola 2026/2027 duas partiziuns provisoricas da la «scolaziun speziala separativa». Il conclus vala per entant a temp limità, il pli ditg però fin ch'i vegnan stgaffids plazs definitivs. Las expensas – tranter auter per il persunal, per il tschains da locaziun e per divers custs materials – èn budgetadas cun var 629 000 francs per l'onn 2026 respectivamain cun var 922 000 francs a partir da l'onn 2027.

Gia dapi in pèr onns resulta ina mancanza da plazs da scolaziun speziala en las instituziuns da scola speziala per scolaras e scolars che basegnan ina scolaziun speziala pervia d'in impediment spiertal, pervia d'in disturbi da percepziun ubain pervia da plirs impediments. Pertutgà è principalmain l'intschess da la Scola-dimora Cuira (Schulheim Chur). Durant quest onn da scola 2025/2026 stattan a disposiziun en la Scola-dimora Cuira (incl. il nov lieu Areal Merkle) 124 plazs. Il schaner 2026 èn quels occupads quasi cumplettamain. Perquai èsi necessari da stgaffir a curta vista plazs provisorics per duas partiziuns (tut en tut almain 12 plazs) en la «scolaziun speziala separativa» per l'intschess da la Scola-dimora Cuira.

Perquai che las capacitads da spazi da la Scola-dimora Cuira èn exauridas cumplettamain, stgaffescha la Casa Depuoz duas partiziuns da scolaziun speziala a Tumein. Uschespert ch'igl è fixà la data cura che la Scola-dimora Cuira stgaffescha ils plazs necessaris per il basegn a lunga vista, vegn valità da nov, sch'ils plazs da la Casa Depuoz a Tumein èn necessaris.

©Casa Depuoz

Infurmaziuns: Departament d'educaziun, cultura e protecziun da l'ambient