Il Departament d'educaziun, cultura e protecziun da l'ambient ha elegì Sandro Decurtins sco successur da Reto Weiss che va en pensiun suenter 14 onns sco archivari dal stadi. Sandro Decurtins vegn a cumenzar sia plazza il 1. d'october 2026.

Sandro Decurtins è creschì si a Trun ed ha absolvì il gimnasi a la claustra da Mustér. A Turitg ha el studegià istorgia e geografia, suenter ha el fatg il master en scienzas d'archiv a las universitads da Berna e da Losanna. L'um da 44 onns lavura – suenter in'activitad da plirs onns en l'Archiv dal stadi da l'Argovia – dapi l'onn 2013 sco vicearchivari dal stadi en l'Archiv dal stadi dal Grischun. El ha rimnà durant blers onns experientscha en il sectur d'archiv ed ha publitgà diversas ovras davart l'istorgia e davart ils fatgs d'archiv dal Grischun.

Responsabladad per 800 onns tradiziun
L'Archiv dal stadi è l'archiv dal chantun Grischun e da ses antecessurs giuridics. Ils effectivs da funtaunas autenticas van enavos var 800 onns ed èn in bain cultural unic. Per la perscrutaziun istorica davart il Grischun e davart las anteriuras regiuns subditas è l'Archiv dal stadi il post da consultaziun central. El surpiglia da las autoritads chantunalas, ma er da vart privata, permanentamain ulteriurs documents – oz savens en furma digitala. Quels ston esser adattads per chapir l'istorgia dal chantun e l'agir statal. L'Archiv dal stadi è public e po vegnir visità gratuitamain. Organisatoricamain è el attribuì a l'Uffizi chantunal da cultura.

Fotografia agiuntada:

Infurmaziuns:

• Cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01 (cuntanschibel da las 14.30 fin las 15.00), e‑mail Jondomenic.Parolini@ekud.gr.ch
• Ursin Widmer, manader da l'Uffizi da cultura, tel. +41 81 257 48 01 (cuntanschibel da las 14.30 fin las 15.00), e‑mail Ursin.Widmer@afk.gr.ch

Responsabladad: Departament d'educaziun, cultura e protecziun da l'ambient