Sin invitaziun da la Regenza grischuna ha il Cussegl da stadi dal chantun Tessin visità oz suentermezdi il chantun Grischun. En il rom dal discurs da lavur constructiv a Cuira èn vegnids tractads differents temas interchantunals.
A chaschun da sia visita en il chantun Grischun è il Cussegl da stadi, sco che la Regenza chantunala dal Tessin sa cloma, vegnì timunà dal president Norman Gobbi. Accumpagnà han el la cussegliera da stadi Marina Carobbio Guscetti sco er ils cussegliers da stadi Christian Vitta e Raffaele De Rosa. Medemamain fatg part a la delegaziun han il chancelier Arnoldo Coduri ed il delegà per las relaziuns externas Francesco Quattrini.
Las regenzas dals chantuns Tessin e Grischun èn sa scuntradas ad in discurs da lavur en la sala da la Regenza a Cuira. En il center èn stads la participaziun da la Confederaziun als custs che stattan en connex cun ils donns da l'ambient la stad 2024, il futur management dal luf en ils dus chantuns sco er la pesta da portgs africana. En pli èn er vegnids discutads il pachet da distgargia 27 da la Confederaziun, la promoziun da la lingua e cultura taliana, sco er ulteriurs temas transcunfinals.
Suenter il barat constructiv han las duas delegaziuns visità communablamain il Museum d'art dal Grischun a Cuira e giudì ina tura guidada dal directur artistic Stephan Kunz.
Fotografias agiuntadas:
Las duas delegaziuns guvernamentalas en la Chasa grischa a Cuira.
President da la Regenza Martin Bühler beneventa il president dal Cussegl da stadi Norman Gobbi.
Infurmaziuns:
President da la Regenza Martin Bühler, schef dal Departament da finanzas e vischnancas, e‑mail Martin.Buehler@dfg.gr.ch
Responsabladad: Regenza