Il dumber da trieps da lufs en il chantun Grischun è restà cun 11,5 trieps stabil il 2025 cumpareglià cun l'onn avant. Il medem mument ha l'Uffizi da chatscha e pestga registrà totalmain 217 stgarpadas d'animals da niz, quai ch'è circa tuttina bleras stgarpadas sco l'onn avant. En vista a la perioda da pasculaziun dal 2026 èn vegnids sajettads proactivamain 35 lufs tranter il 1. da settember 2025 ed ils 31 da schaner 2026.

Cun 11,5 trieps è il dumber da trieps da lufs en il chantun Grischun restà l'onn passà tuttina grond sco l'onn avant. Ils 11,5 trieps da lufs confermads il 2025 resguardan er ils trieps che sa movan sur ils cunfins. Quests trieps vegnan quintads proporziunalmain sco mezs trieps. Sa furmads da nov èn ils trieps da Seta, Agnas, Sinestra e Frisal (cf. agiunta). Il dumber da stgarpadas d'animals da niz confermadas en il chantun è stà cun 217 animals prest sin il medem nivel sco il 2024, cura ch'ins ha dumbrà 213 stgarpadas. Sco ils onns avant han ils lufs stgarpà principalmain nursas e chauras (97,7 %). Tar las spezias dals arments e dals chavals è il dumber d'animals stgarpads restà constant cun 5 cas (2,3 %).

En singuls cas han ins observà il 2025 lufs cun cumportaments problematics. Cumpareglià cun il dumber e la derasaziun d'observaziuns marcantas èn ils lufs tut en tut main preschents en la vischinanza d'abitadis ch'ils onns avant. Quai dastgass d'ina vart esser pervia da las cundiziuns meteorologicas miaivlas. Da l'autra vart eventualmain pervia da la regulaziun durant ils mais d'atun 2024 e 2025. Tge influenza che la regulaziun ha precis, pon ins dentant giuditgar da maniera pli fidabla pir cun dapli experientscha e cun ulteriuras observaziuns.

Regulaziun cun buns resultats
En il fratemp èn avant maun las analisas dal DNA dals lufs sajettads l'atun e l'enviern 2025. Quellas mussan, ch'igl ha dà pli paucas sajettadas falladas en cumparegliaziun cun l'onn avant. Vegnids sajettads èn er dus lufs che n'appartegnevan betg ad in triep. Er quest dumber è stà pli pitschen che l'onn precedent. Questa valur dependa dentant en emprima lingia da la situaziun dal luf locala e sa lascha influenzar mo en moda limitada.

Ils resultats mussan plinavant, ch'ins ha sajettà la luffa dominanta dal triep da Sinestra. Er ils lufs dominants dals trieps da Moesola e Muchetta èn vegnids sajettads. Tuts trais trieps eran vegnids dads libers per la prelevaziun. «Talas intervenziuns pon chaschunar ch'in triep vegn schlià u stgatschà, u ch'il luf genitur restant tschertga e chatta in nov partenari», di Adrian Arquint, il co-manader da l'Uffizi da chatscha e pestga. «Co che la situaziun sa sviluppa en quests territoris, vegn il monitoring current a mussar ils proxims mais.»

Ulteriuras infurmaziuns davart la populaziun da lufs sco er davart la realisaziun da la regulaziun èn disponiblas en l'agiunta «Fegl d'infurmaziun davart la preschientscha e la regulaziun dal luf 2025/2026».

Agiunta:

Fegl d'infurmaziun davart la preschientscha e la regulaziun dal luf 2025/2026

Infurmaziuns:

Arno Puorger, manader da la partiziun Animals da rapina gronds, Uffizi da chatscha e pestga, tel. +41 81 257 87 67 (cuntanschibel da las 10.30 fin las 11.15), e‑mail Arno.Puorger@ajf.gr.ch

Responsabladad: Uffizi da chatscha e pestga