Ils 14 da zercladur 2026 han lieu las elecziuns dal Cussegl grond. Fin ier ha la Chanzlia chantunala survegnì 170 propostas electoralas ch'èn repartidas sin 6 gruppas da glistas cun tut en tut 522 candidatas e candidats.
La procedura per inoltrar las propostas electoralas per las elecziuns dal Cussegl grond è organisada sin plaun regiunal e cumpiglia las suandantas etappas:
- 23 da mars 2026, a las 12.00: Ultim termin per inoltrar las propostas electoralas a las regiuns
- 30 da mars 2026: Eventuala rectificaziun da las propostas electoralas tras las regiuns
- 1. d'avrigl 2026, a las 12.00: Ultim termin per las regiuns per transmetter las glistas definitivas e giuridicamain liantas a la Chanzlia chantunala
Fin ier, il 1. d'avrigl 2026, han las regiuns transmess a la Chanzlia chantunala 170 propostas electoralas ch'èn repartidas sin 6 gruppas da glistas cun tut en tut 522 candidatas e candidats (176 dunnas, 346 umens).
Resalvadas restan eventualas rectificaziuns chantunalas (candidaturas multiplas / designaziuns da glistas) e la numeraziun da las glistas.
Designaziuns da las gruppas da glistas
A la Chanzlia chantunala èn vegnidas annunziadas las suandantas designaziuns per las 6 gruppas da glistas:
- Il Center Grischun
- Partida Socialdemocratica
- Partida Verd-Liberala dal Grischun
- PLD.Ils Liberals Grischun
- PPS Grischun
- VERDA Grischun
Trair la sort per ils numers da las glistas
La sort per ils numers da las glistas vegn tratga ils 7 d'avrigl 2026. Suenter la decisiun tras la sort, ca. a las 15.30, vegnan ils resultats publitgads en l'internet sin www.gr.ch.
Las gruppas da glistas, las glistas e tut las candidatas ed ils candidats vegnan la finala publitgads uffizialmain ils 9 d'avrigl 2026 en il Fegl uffizial chantunal.
Agiunta
Glistas, candidatas e candidats
Infurmaziuns:
Daniel Spadin, chancelier, Chanzlia chantunala, tel. +41 81 257 22 21 (cuntanschibel da las 10.00 fin las 12.00), e-mail Daniel.Spadin@staka.gr.ch
Responsabladad: Chanzlia chantunala