Céline Aubry surpiglia a partir dal 1. d'avust 2026 la direcziun da l'Uffizi per l'execuziun giudiziala dal Grischun. Céline Aubry daventa successura da Mathias Fässler, che va en pensiun suenter 13 onns en la direcziun da l'uffizi.
Céline Aubry ha 48 onns ed è da Flem. Ella ha studegià relaziuns internaziunalas a l'Universitad da Genevra. Ultra da quai ha ella in certificate of advanced studies (CAS) en dretg da procedura penala da l'Universitad da Son Gagl ed ha fatg furmaziuns supplementaras en direcziun e management. Ella è stada plirs onns manadra dal svilup da l'interpresa a la Clinica universitara Balgrist sco er uffiziera tar l'Uffizi federal da la duana e da la segirezza dals cunfins (UDSC). Plinavant è ella stada vicescheffa da la Polizia criminala federala tar l'Uffizi federal da polizia (fedpol). Actualmain lavura ella sco manadra da project senior en il sectur segirezza e giustia sco er en il sectur execuziun giudiziala tar la CSP SA a Turitg. Ella ha damai blers onns experientscha da management e da direcziun en l'administraziun publica ed en la collavuraziun cun partenaris. Tar l'Uffizi per l'execuziun giudiziala vegn ella a manar in team da var 220 persunas che lavuran en trais differents lieus.
L'Uffizi per l'execuziun giudiziala dal Grischun exequescha sancziuns penalas ed è responsabel per l'arrest d'inquisiziun, da segirezza e d'extradiziun. Ultra da quai è el er cumpetent per l'assistenza da reabilitaziun e per l'assistenza sociala en il chantun Grischun, e quai per la durada da la procedura penala e da l'execuziun dal chasti. En il Grischun vegn l'execuziun da chastis e da mesiras pia reglada sco sectur tematic unitar e sco incumbensa cumplessiva, nua che differentas gruppas professiunalas lavuran en moda interdisciplinara cun persunas che han commess malfatgs, per impedir ulteriurs acts criminals.
Fotografia:
Infurmaziuns:
Cusseglier guvernativ Peter Peyer, schef dal Departament da giustia, segirezza e sanadad. Las dumondas vegnan coordinadas da Laura Bernasconi, collavuratura communicaziun dal Departament da giustia, segirezza e sanadad, tel. +41 81 257 27 09, e‑mail medienstelle@djsg.gr.ch
Responsabladad: Regenza