Il Departament da giustia, segirezza e sanadad ha elavurà in nov model directiv per organisar il provediment da la sanadad en il chantun. La collavuraziun dals purschiders en las regiuns da provediment da la sanadad duai vegnir intensivada e la rolla dals ospitals publics en las regiuns vegnir definida en moda pli clera. Per realisar las finamiras strategicas dal model directiv dovri investiziuns ed adattaziuns da leschas.
Il chantun insista explicitamain sin il provediment decentral. Las regiuns da provediment da la sanadad e cun quai il provediment da sanadad integrà duain vegnir realisads en moda consequenta en tut il chantun. «Cun il provediment integrà gudognan tant la populaziun sco er las instituziuns. Quai vesain nus là, nua ch'il process è gia vegnì realisà», di Peter Peyer, schef dal Departament da giustia, segirezza e sanadad.
Il Model directiv da sanadad dal Grischun mussa in basegn d'agir en differents secturs e definescha tschintg finamiras strategicas per ils proxims 10 onns.
Sfidas dals servetschs da salvament e da l'assistenza da parturir
In basegn d'agir exista tranter auter areguard la refurma dals servetschs da salvament ed en connex cun l'assistenza da parturir. Per l'organisaziun futura dals servetschs da salvament vegn ina gruppa da lavur ad elavurar differentas variantas. En connex cun l'assistenza da parturir èsi impurtant da garantir en tut il chantun la segirezza per las mammas en speranza. D'ina vart duain vegnir resguardads adequatamain ils basegns da famiglias giuvnas e vegnintas d'avair in'assistenza datiers da lur domicil. Da l'autra vart èsi a medem temp necessari da garantir la segirezza e la qualitad maximala e da tegnair quint da la mancanza da persunas spezialisadas e da l'experientscha pratica necessaria da las spendreras. Il model directiv recumonda da betg pli manar vinavant tut las partiziuns da naschientscha.
Ils Servetschs psichiatrics duain sustegnair pli savens las instituziuns decentralas cun persunas spezialisadas e cun il transfer da know-how. En il sectur da la medischina da chasa vegn evaluada la pussaivladad da consegnar medicaments. Particularmain en la periferia duain er vegnir elavuradas novas soluziuns per il servetsch d'urgenza tras las medias ed ils medis da chasa.
Regulaziun da l'ospital chantunal
L'Ospital chantunal dal Grischun ha ina funcziun dubla: Per l'ina procura el per il provediment da basa per la regiun da Cuira e per la Val dal Rain Grischuna, per l'autra è el l'ospital central per assegnaziuns da pazientas e pazients or dals ospitals regiunals. Il model directiv prevesa da definir da nov la regulaziun da l'Ospital chantunal dal Grischun tras il chantun sco finanziader principal per il sectur da las prestaziuns da center.
Plinavant è il Model directiv da sanadad ina basa per la planisaziun dals ospitals, che l'Uffizi da sanadad ha lantschà la primavaira 2026. Tenor la planisaziun actuala duai esser pussaivel da metter en vigur la nova glista dals ospitals l'onn 2028.
Champs d'acziun strategics
Il model directiv da sanadad 2026–2036 descriva tschintg champs d'acziun strategics cun finamiras correspundentas. Quellas pertutgan:
- Provediment integrà e segirezza dal provediment regiunal
- Demografia e persunas spezialisadas
- Purschida e cooperaziuns
- Transfurmaziun digitala
- Finanziaziun e libertads concepziunalas regulatoricas
Per realisar il Model directiv da sanadad dovri ultra da quai investiziuns sistematicas. Las adattaziuns structuralas e novs models da cooperaziun augmentan a media fin a lunga vista l'effizienza e duain gidar a stabilisar ils custs.
Cun differents process legislativs che vegnan ussa lantschads, duai il model directiv daventar obligatoric. «Il sectur da sanadad sa mida fitg svelt. Plinavant è il Grischun confruntà cun grondas sfidas demograficas. Cun il model directiv vulain nus integrar quests svilups en moda prospectiva en la planisaziun», di il cusseglier guvernativ Peter Peyer.
Agiuntas:
Infurmaziuns:
- Cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 89 71 (cuntanschibel da las 11.00 fin las 12.00), e‑mail Medienstelle@djsg.gr.ch
- Sandra Stöckenius, manadra da l'Uffizi da sanadad, Tel. +41 81 257 44 57 (cuntanschibla da las 17.00 fin las 18.00), e‑mail Medienstelle@djsg.gr.ch
Responsabladad: Departament da giustia, segirezza e sanadad